Radio, online – Relasiona ho konfrontasaun entre joven iha Distritu Baucau Villa husi bairo Sentral ho bairo Lamegua (21/8) . Situasaun ne’e hodi PNTL halo orario katak iha kalan sai hanesan estadu de sitiu. Rezultadu hosi patrolia ne’e fo impaktu ba familia polisia Ajente Nunu de Deus nia familia simu torturasaun inklui nia ferik oan hetan tuku iha ren tos to’o kanek todan.
Akontese torturasaun ba familia polisia ne’e mosu iha Segunda (22/8) kalan tuku 8:00 otl. Patroliamentu ne’e xefia husi Chefe PNTL Distrito Baucau Joao Bareto no Inspektor Lambertu Boavida ho elementus kuaze nain 10 ba leten.
Hodi kazu ne’e lao ba oin Vitima Odete Manuela Goncalves Varela (30) hamutuk ho nia kaben Ajente Nunu de Deus halo keisa ba iha Parlamentu Nasional liu husi komisaun B ne’ebe trata asuntu Defeza no Seguransa Kinta, (25/8) iha uma fukun PN.
Liu husi hasoru malu ne’e vitima konta kronoliogia ba akontesementu ne’e katak, problema entre joven sira husi bairo Lamegua no Sentral familia vitima la hatene. Iha kalan tuku 8 familia vitima tur iha uma oin derepenti kareta patrolia liu, hodi dereita tama kedan iha uma oin.
Polisia sira la koalia lia fuan ruma baku kedan alin mane husi vitima Odete, nune’e mos oknum polisia baku tan inan-aman vitima Odete nian. Iha agresifu ne’e alin mane husi vitima Odete hetan inus ran no nia kakoruk bubu tanba buti. Nune’e mos odete nia inan hetan tebes ba ninia lulik fatin.
Iha momentu ne’e polisia sira mak halo patrolia ne’e dehan ba vitima sira katak, agora ne’e estadu de situ, imi hatene ga lae?. Dehan polisia ida.
Ajente Nunu de Deus vitima Odete nia kaben mos iha kalan ne’e, iha momentu atu baku nia la hatene tanba iha oras tuku 8 sei hare TVTL ho programa telejonal. Derepenti hakilar husi liur dehan maun…………..maun…………mana… Dete kanek. Ho ida ne’e nia hakfodak sai mai liur hodi husu ba ninia kolega polisia sira dehan, tanba saida mak imi baku hau nia fen hanesan ne’e. tuir Nunu nia hare polisia sira iha kalan ne’e ho kondisaun lanu.
“Iha kalan ne’e hau nia pistola iha hela, maibe hau lakoi hanoin at hodi kontra hau nia maluk, tanba laos iha hau nia area servisu. Hau tenki hatudu nudar polisia profesionalizmu,”nia konfesa.
Depois grupo patrolia halo torturasaun ba familia. Ajente Nunu lakoi halo problema nia lori nia ferik oan ba iha ospital referal Baucau hodi halo tratamentu. Iha kalan ne’e vitima fila mai uma maibe familia sira iha uma laiha tanba polisia sira rega gas air mata hodi sira halai hotu ba toba iha vizinhu sira nia uma.
Konaba kazu ne’e PNTL Distritu Baucau la atende ho nune’e vitima mai hasoru PN komisaun B atu halo prosesa tuir dalan legal. Vitima mos husu ba komando PNTL atu fo atensaun ba kazu ne’e.
Hatan ba problema hirak ne’e Deputado Bankada Fretilin David Diaz Ximenes husu ba vitima tenki levanta kazu ne’e ba oin, liu hosi Komando Geral PNTL, tanba PNTL Baucau nia membrus sira mak involve. Imposibel PNTL Baucau rezolve kazu ne’e ho justu.
“Ami sei karta pedidu ida ba Komando Geral atu atende didiak kazu ne’e, see lae imajen PNTL nian sei at tanba defende deit nia membrus sira,”dehan Mandati.
Nune’e mos Deputadu husi CNRT Paul Martins hateten, problema ida ne’e hanesan krimi ida, tanba ne’e kazu ne’e sei lori ba iha Quartel Geral Komando PNTL atu nune’e bele rezolve lalais.
“Hau tristi los inan feto sira sei hetan baku nafatin husi ita nia polisia. Tuir lolos polisia tenki defene inan feto sira tanba sira ne’e kbi’it laek,”nia lamenta atetudi oknum polisia nian ne’e.
Discussion about this post