Aileu,17/09/2024, Ema ho Defisiénsia munsipiu Aileu lamenta tebes ho komisaun organizadora husi parte igreja nian tanba la envolve ema ho defisiénsia sira iha komisaun organizadora ba sua santidade nia vizita, tanba ne’e defisiénsia sira konsidera katak parte igreja la halo inkluzivu ba Ema ho Defisiénsia.
Tuir Koordenador Organizasaun Nabilan Ba Futuru Fernando Tilman Alves hateten katak agradese ba governu ne’ebé mak servisu makaas hodi ba to’o iha Vaticano ikus mai Sua Santidade Papa Francisco mai vizita Timor-Leste.
“senti triste loos tanba ha’u la partisipa direita misa solene ne’e tamba iha mos regras ne’ebé protokolu hatun katak se mak atu ba partisipa missa solene tenki resjistu karik la registu iha igreja entaun labele partisipa,tanba ne’e mak limita ami atu partisipa direta,entaun akonpaña, live streaming husi televizaun de’it” dehan Koordenador Organizasaun Nabilan Ba Futuru Fernando Tilman ba Jornalista Radio Liberdade.
Entertanto Defisensia ne’e haktuir tan katak Orsamentu ne’ebé mak komisaun sira jere nunka envolve ema ho Defisiénsia iha laran nune’e defisiénsia sira konsidera orsamentu ne’ebé prevee ba vizita sua santidade ne’e laiha inkluzivu.
“Tuir dadus ne’ebe ami hetan katak orsamemtu hamutuk $ 9545.00, nune’e ha’u atu dehan katak parokia Aileu esklui ema ho Defisiénsia no ha’u koko aproxima ona ho parte relevante lubuk ida no ami nafatin halo Advokasia ho ida ne’e no sei husu Relatorio Pareser ne’ebe mak iha kona-ba Orsamemtu ne’e prevee husi Guverno mai Autoridade Munisipiu ne’ebé mak aloka mai iha Parokia Aileu”. Haktuir Fernando Tilman.
Iha fatin hanesan defisiente Imaculada Soares Ellu hateten iha vizitasaun sua Santidade nian ne’e hanesan preveliju boot ba Timor-Leste, lori bensaun ne’ebé diak ba ema hotu maibe lori mos triste ba ema ne’ebé hetan eviksaun husi parte SEATOU nian liu-liu ba ema defisensia, ferik katuas no labarik ki’ik sira.
“Há’u orgullu los bainhira partisipa iha missa solene ne’ebé prejidu husi sua santidade papa Francisco, ida ne’e mak ha’u senti kontente maibe triste tanba fatin ne’e kobre ba sarani hotu, maibé partisipasaun ema ho defisensia nian menus loos tanba fatin serimonia ne’e ladun iha asesivel ba ema ho defisiénsia sira inklui ferik katuas no labarik kiik sira” Dehan Imakulada.
Defisensia ne’e haktuir katak fatin ne’ebé la asesivel ba ema ho defisensia ne’e tanba parte komisaun organizadora sira la envolve ema ho defisensia hodi servisu hamutuk atu prepara fatin ne’ebé digno ba ema ho defisensia no ba em hotu tanba ne’e komisaun sira sei exklui ema ho defisensia sira iha eventu importante sira ne’e.
Tuir dados iha sensus 2022 uma kain rejistu ema ho defisensia total rihun 93 iha Timor-leste, maibe ema ho defisensia 100 mak partisipa iha missa solene ne’e inklui munispiu Aileu nain ida.
𝗝𝗼𝗿𝗻𝗮𝗹𝗶𝘀𝘁𝗮 𝗡𝗮𝘁𝗮𝗹𝗶𝗻𝗮 𝗱𝗲 𝗔𝗿𝗮𝘂𝗷𝗼
𝗘𝗱𝗶𝘁𝗼𝗿: 𝗡𝗮𝘁𝗮𝗹𝗶𝗻𝗼 𝗫𝗶𝗺𝗲𝗻𝗲𝘀
Discussion about this post