Dili 06/05/2024- Asosiasaun Halibur Defisiénsia Matan Timor-Leste (AHADMTL) kondena tebes hahalok membru Servisu Nasionál Intelijénsia (SNI) ne’ebé tiru joven ida hosi kotuk to’o borus iha kalilin, no baku tan joven na in-rua, inklui maluk defisiénsia matan ida iha suku Beiseuk, Postu administrativu Tilomar, Munisípiu Covalima (1/5/2024).
Tuir relatóriu hosi fatin akontensimentu, SNI ne’e baku maluk defisiénsia matan to’o liman tohar ho kondisaun grave (iha parte liman-loos). Tanba ne’e, Asosiasaun Halibur Difisiénsia Matan Timor-Leste liuhosi komunikadu emprensa ida-ne’e, hato’o ami-nia lamentasaun no kondena tebes aktu brutalizmu hirak ne’e.
“Nu’ udar ita hotu hatene katak Timor-Leste estadu direitu demokrátiku, iha ne’ebé Supremásia Konstituisaun, ema hotu hanesan iha lei nia oin no respeitu ba direitus humanus, nu’udar prinsípiu báziku sira iha estadu direitu demokrátiku. Hahún ba prinsípiu estadu direitu mak, ami hosi Asosiasaun Halibur Defisiénsia Matan Timor-Leste, kondena aktu ne’ebé komete hosi membru Servisu Nasionál Intelijénsia nu’udar aktu ne’ebé viola prinsiípiu hirak ne’e, liuliu violasaun ba direitos humanos, ein espesiál viola direitu ema ho difisiénsia nian” hateten Portavóz Cárceres Nunes Arca Tura iha Maleuana ohin.
liuhusi Komunikadu ida-ne’e, sira ejiji ba:
- Komandu Jerál PNTL, Diresaun Servisu Nasionál Intelijénsia atu toma responsabilidade ba aktu ne’ebé komete hosi membru SNI no prosesa ho transparante no rigór tuir regulamentu hotu mak vigora iha estadu ida-ne’e, se justu liu demiti hosi nia kargu;
- Provedoria Direitos Humanos e Justiça (PDHJ), atu tulun vititima sira hodi prosesa no akompaña prosesu investigasaun sira atu bele la’o ho transparente to’o hetan justisa loloos;
- Ministériu Defeza no Seguransa hamutuk ho PNTL no F-FDTL kopera ho PDHJ atu integra matéria sira kona-ba direitos humanos, liuliu direitu ema ho defisiénsia nian iha formasaun akademia PNTL no F-FDTL nian, atu iha futuru asaun sá de it mak membru seguransa sira hala’o iha terenu bele respeita povu kbi’it-laek nia direitu, liuliu direitu ema ho defisiénsia nian;
- Instituisaun PNTL no F-FDTL nu’udar protetór lei no ordén no liman-kro’at povu nian atu hatudu profisionalizmu iha atuasaun sá de’it iha ambiente estadu direitu demokrátiku no tau aas no respeita prinsípiu sira direitos humanos nian, liuliu direitu Ema ho Defisiénsia;
- Sosiedade hotu, atu respeita ami defisiente sira-nia direitu iha asaun prátiku sá de it hodi ami mós bele goza direitu ho liberdade iha ambiente estadu direitu demokrátiku.
Portavóz haktuir depois de komunikandu impresa sira mos sei prepara dadus konkreta atu hatama petisaun ba parte relevante ne’ebé toma konta seguransa nian atu hetan justisa ne’ebé loloos ba aktu oknum refere komete.
“Ami parte hanesan organizasaun ba ema ho difisiénsia liliu organizasaun ne’ebé mak proteje direitu ema ho difisiénsia ami nota katak ida ne’e violasaun bo’ot ida, liliu violasaun ba konvensaun diretu ema ho difisiénsia nian tuir artigu 16 alinea 2 hateten, estadu partisipante sira tuir lei tenki foti sasukat wainhira atu halo torturasaun judisial tenki haree ba kondisaun ema ho difisiénsia sira” portavóz ne’e afirma
Nia afirma kronolojia ne’ebé hetan husi kazu ne’e nota katak membru SNI refere viola tomak konvensaun ba ema ho difisiénsia no seidauk haree ba kontituisaun no konduta PNTL ninian.
“Tuir kronolojia ne’ebé ita hetan katak ema ho difisiénsia refere (Vítima) nia ho distansia metro 200 dook husi konflitu ne’ebé antes SNI refere ba halo atuasaun, entaun ita haree menbru ne’e halo violasaun bo’ot, ida mak vitima dook husi konflitu 200 metru no ida mak vitima ho kondisaun difisiénsia no poir liutan mak menbru baku to grave”
Husi asaun sira ne’e AHADTL konsidera menbru SNI refere prejudika future ema ho difisiénsia liu vítima ne’ebé hetan violasaun, tanba posibilidade nia bele hetan tan difisiénsia dupla, nia iha ona difisiénsia matan ba future nia liman tohar nia hetan tan difisiénsia fíziku.
“AHADMTL mós hakarak atu hetan justisa ne’ebe loos no justu I sé di’ak liutan demite menbru ne’e husi kargu, ne’e ma kami nia hakarak, tanba nia hanesan ema liman kroat povu nian no nia hetan formasaun lubuk ida, entaun estadu investe nia atu proteje ema liu husi lei no liu husi konvensaun no tratadu internasional ne’ebé estadu governu ratifika no prezidente promulga” dehan Cárceres.
Entretantu Vítima no hetan violasaun no agresaun fiziku husi Menbru Servisu sekretu hafoin fila husi reza tersu iha Oetaba postu Administrativu Tilomar, Munisípiu Covalima.
Jornalista : Natalino Ximenes
Discussion about this post