Dili, 03/05/2024- Fundasaun Média Development Centre FMDC ho UN-Women Rekonese Kna’ar Média Timor-Leste hakerek notisia ho respeitu no inkluzivu, hodi hapara violénsia bazeia ba jéneru ho nune’e FMDC parseira ho UN Women no kolaborasaun ho Konselhu Imprensa anúnsiu rezultadu ba manan nain média sira ne’ebé mak antes ne’e hetan formasaun konaba reportajen sensivel ba jéneru no sira kontinua hakerek notisia liga ba iha asuntu igualidade jéneru nian.
Tuir Diretor FMDC Fransisco da Silva Gari hatete liu husi formasaun ne’ebé durante ne’e FMDC no UN WOMEN partilla ba jornalista sira inklui estudante komunikasaun sosial sira hetan no halo pratika hakerek notisia sai hanesan kompetisaun ne’e objetivu atu haburas jornalizmu, ambiente média ne’ebé inkluzivu liuhusi hasa’e konsiénsia no kualidade kona-ba asuntu sira relasiona ho reportajen sensivel ba jéneru.
“Ami kontinua enkoraja jornalista, média boot sira atu kria konteudu ne’ebé sensitivamente responde ba asuntu jéneru, dezafia estereotipu iha sira nia reportajen atu sublina esperensia no prespetiva husi feto labarik feto no komunidade marzinalizadu sira liu husi jornalismu responsavel” dehan Fransisco ba jornalista sira iha Suai Room Timor-Plaza
Iha fatin hanesan xefi misaun UN WOMEN Amy Nishtha Satyam hatete sira nia komprimisu atu promove igualidade jéneru feto ho nune’e sira kria Manual Reportajen Sensivel ba jéneru ne’e oferese orientasaun pratiku hodi halo kobertura konaba violénsia bazeia ba jéneru ho justu, imparsial, respeita integridade sobrevivente sira nian.
“Manual ne’e sublina importansia atu haforsa tan lian sobrevivente sira nian, hakotu silensia ne’ebé haleu violénsia bazeia ba jéneru, no promove kultura responsabilidade, ha’u enkoraja organizasaun média sira hotu atu utiliza manual ida ne’e integra prinsipiu sira iha imi nia prátika ba reportajen nian” dehan Amy Nishtha.
Inisiativa ida ne’e hanesan parte ida husi projetu Hamutuk ba igualidade ne’ebé jere husi UN WOMEN no finansia husi KOICA. “Ami sente orgullu hodi suporta projetu ida ne’ebé hakonu média ho instrumentu sira halo reportajen sensivel ba jéneru hansan investimentu ida iha futuru ekuitativu liu, média iha kbiiit atu dezáfia estereotipu, hatudu injustisa promove kultura respeitu no igualidade, ” haktuir, Younhwa Kang, diretora KOICA Timor-Leste.
Projetu ne’e implementa husi FMDC hahu husi fulan Juñu 2022 to’o Maiu 2024, ho objetivu atu hasai kapasidade pesoal média, estudante jornalismu, funsionariu, organizasaun sosiedade sivil atu aumenta sira nia abilidade atu halo reportajen ne’ebé loos, liuliu konaba kestaun violénsia bazeia ba jéneru.
Rezultadu husi projetu ne’e mak jornalista no estudante jornalista sira hamutuk 135 mak partisipa ona treinamentu konaba reportajen sensível ba jéneru, kria manual ida, no instrumentu ida ba monotorizasaun, kria kompetisaun reportajen sensivel ba jéneru ba média neen hanesan Timor post, Suara Timor Lorosa’e, INDEPENDENTE, Neon Metin, Hatutan.com no Tatoli.tl.
Entretantu Media no Jornalista ne’ebé sai manan nain tanba hakerek konteudu notisia ne’ebé sensivel ba jeneru tuir monitorizasun husi FMDC ho parseiru no identifika media STL sai hanesan primeru Lugar hetan osan ho montante dolar $ 1.000 mil, Segundu lugar mak Media INDEPENDENTE no montante dolar $ 750, no Terseiru lugar Media Neon Metin ho osan dolar $ 500. Iinklui mós jornalista sira ne’ebé mak halo reportanjen hetan prémiu hanesan Leptop 1 ba Jornalista husi STL, mobile Android 1 ba Jornalisa husi Media INDEPENDENTE ho Neon Metin.
Projetu Hamutuk ba Igualidade ka Together for Equality atu prevene no responde ba Violensia Bazeia ba Jéneru iha Timor-Leste ne’ebé implementa hamutuk husi ajensia ONU haat (IOM, UNDP, UNFPA, UN WOMEN no finasiamentu husi Korea International Cooperation Agency (KOICA, Sigla ingles).
Jornalista : Natalina Araújo
Editor : Natalino Ximenes
Discussion about this post