Dili, 22/04/2024– Relasiona ho loron mundiál ba rai ne’ebé monu iha 22 Abril 2024, Rede ba Rai, hamutuk ho Asosiasaun HAK, Luta hamutuk no organizasaun Sosiedade civil sira seluk realiza konferensia da imprensa hodi ejije ba governu atu hakotu desigualidade no injustisa ba direitu ba rai iha Timor-Leste .
Kapitál Dili sai sentru konsentrasaun ba atividade hotu-hotu obriga ema barak husik sira nia hela fatin atu mai iha Dili hodi buka moris no sobrevive. Wainhira estadu la iha kontrolu diak mak ema barak sei okupa rai arbiru hodi hela no buka moris maibe kondisaun ida sai preokupasaun ba guvernu, nune’e guvernu liuhusi Sekretariu Estadu Asuntu Toponomia no Organizasaun Urbana (SEATOU) halo eviksaun ba komunidade ne’ebe hela iha espasu públiku hodi normaliza hikas sidade Dili.
Eviksaun ne’ebé SEATOU halo ba komunidade sira iha Bidau no Ai-tarak laran, sosiedade sivil konsidera nudar asaun brutalizmu tanba laprepara kondisaun antes, fó risku tebes ba komunidade sira, liu-liu inan feton no labarik sira ne’ebe la iha fatin alternativa ba sira atu hela sa tan agora dadauk tempu udan.
Diretór Ezekutivu Luta Hamutuk, José Alves da Costa, hateten Sosiedade sivil sei hamutuk ho vítima atu halo asaun hasoru governu hodi responsaliza ba komunidade ne’ebé sai vitima ba eviksaun.
“Nasaun ne’e demokrásia asaun ne’ebe SEATOU halo ne’e asaun brutalizmu, nune’e ami sosiedade civil kontinua aprosima liuhusi meius hotu-hotu maibé kuandu laiha solusaun ami sei mobiliza atu halo asaun demostrasaun hasoru SEATOU no Parlamentu Nasional tanba sira lareprezenta povu, eviksaun ne’e nia impaktu maka labarik sira la ba eskola, labarik sira labele deskansa ho di’ak, ida ne’e laos umanu ona maibé ita nia guvernu ida ne’e diabu, ita labele tolera tan“ Tenik Alves
Iha fatin hanesan Koordenador Nasionál Rede ba Rai, Hortencio Pedro Vieira, husu ba ema hotu atu labele fó sala ba komunidade afeitadu tanba laos sira nia sala guvernu maka la halo jestaun di’ak ba povu nune’e aktu saida deit maka guvernu halo ne’e presija tau valór umanu.
“bainhira ita sobu ema nia sasan ne’e konsidera bandalizmu tanba ita gosta estraga ema nia sasan, ita labele haree povu hanesan inimigu ida” Tenik nia.
Iha konferensia impresa ne’e sosiedade Sivil hato’o rekomadasaun sira hanesan, husu governu tenke iha planu no politika ba rai ne’ebe integradu atu bele asegura komunidade sira nia direitu ba rai, ba SEATOU atu respeita no halo tuir konvensaun internasional direitus umanus sira ne’ebe mak nasaun Timor-Leste ratifika ona liu liu prosedimentu sira ne’ebe mak governu tenke halo antes, durante no depois de despezu/eviksaun no husu ba Ministériu Justisa tenke pronunsia despezu ne’ebe mak dadauk ne’e akontese tuir dalan legál ka lae.
Jornalista : Deshy Reis
Discussion about this post