Dili- Ijolina ema ho defisiénsia fizíku buka moris rasik hodi sustenta nia an no la depedente ba familia tanba nia moris mai ho de’it inan faluk ida.
Ijolina Doutel Sarmentu husi Munisipiu Viqueque, Postu-Administrativu Uatu-Carbau Suku Loi-Ulu, dadaun ne’e hela iha Aldeia Lutumutu, Suku Tirilolo, Munisipiu Baukau, Moris iha loron 16 fulan Fevereiru tinan 1988. Hahu nia eskola primaria iha eskola Loi-Ulu maibé la remata no kontinua fali iha eskola primaria 01 Postu Administrativu Uatu-Carabau, Munisipíu Viqueque. Kontinua nia eskola Pre-Sekundáriu iha Essa Senor Teulale Baucau 2010, atu kontinua nia estudu sekundaria maibé ijolina enfrenta problema finanseiru, nune’e feto ho defisénte fiziku ne’e eskola to’o de’it Pre-Sekundáriu.
Joven ne’e haktuir nia oan feto mesak de’it iha familia no durante ne’e hela ho nia avo no ama, tanba nia apa ho ama divorsiu bainhira nia sei halo tinan neen, entaun nia ho de’it nia ama ho nia avo sira iha momentu ne’ebá bainhira nia avo mate nia ho de’it nia ama, iha tinan 2012 nia ama mate joven defisiente ne’e moris mesak no hala’o negósiu ki’ik sira hodi bele sustenta nia moris loron-loron nian.
Ijolina Doutel Sarmento | foto espesial
“Nune’e iha tinan 2001 ha’u akonpaña kolega no familia sira lulun tisu, depois ha’u rasik koko atu husu ba kolega no familia sira, maibé sira balu la fó hatene no balu fó hatene hodi esplika mai ha’u kona-ba oinsá prosesu halo tisu ne’e, entaun iha momentu ne’eba bainhira ha’u aprende ona no koko hodi halo rasik depois forma iha bikan no raga laran hodi bele fa’an fali. Depois hatene ona oinsá mak prosesu lulun tisu ne’e, entaun iha momentu ne’eba ha’u iha hanoin ida atu lulun nafatin tisu halo ba aifunan hodi faan, no la’os tisu de’it, maibé fa’an mós dosi, torta, inklui halo produsaun ba tenpe nomós tunu sate hodi fa’an””, hateten Ijolina ba Radio Liberdade bainhira dadalia iha nia moris fatin Baucau.
Atividade negósiu liu-liu tisu ne’ebé mak nia halo dalaruma hameno husi komunidade balun ne’ebé halo seremonia permeira kominiaun, sarani labarik sira inklui mós kazamentu ruma no dalaruma mós lori ba edifisiu sira ne’ebé presija.
Difikuldade ne’ebé durante ne’e nia hasoru mak fatin tanba negósiu ne’ebé mak durante ne’e nia hala’o la iha fatin permanente hodi lori sasan sira ne’e ba fa’an, no durante ne’e titip de’it ba kolega sira mak fa’an depois mak fó osan.
Aliende ne’e mós durante akonpaña informasaun liuhusi media social Facebook kona-ba formasaun ema ho difisiensia iha tinan 2017 no nia primeru hatene organizasaun husi Sentru Formasaun Halibur Dezenvolvimentu CFHD ne’ebé fó formasaun ba ema ho difisiénsia sira kona-ba oinsá halo negósiu ne’ebé di’ak inklui mós negósiu sira ne’ebé mak parseria husi NGO fó ba sira.
“Ha’u sempre partisipa hela de’it formasaun sira ne’ebé relasiona asuntu ema ho difisiensia nian ha’u senti kontente tebes bainhira partisipa iha formasaun sira hanesan ne’e, ha’u iha Baukau dalaruma mós tuir formasaun iha RHTO kona-ba negósiu nian iha Dili, tuir mós formasaun iha ADTL nian, hetan mós ajuda sasan ruma husi Pradet iha tinan 2017 ajuda ha’u hodi hala’o negósiu depois fulan ida ka rua hanesan ne’e sira mai chek fali. Aliende ne’e, iha tinan 2018 husi parte CFHD oferese mós orsamentu hodi suporta mós ba negósiu ne’ebé ha’u halo mak hanesan halo dosi no halo tempe inklui mós lulun tisu no ha’u uza tisu halo fali ba aifunan hodi fa’an iha eventu sira”, nia haktuir.
Nia haktuir katak, la’os negósiu de’it mak durante ne’e hala’o, maibé sempre hetan mós oportunidade hodi partisipa formasaun iha Word Vision Baucau nomós organizasaun nasionál sira relasiona ho ema difisiénsia ne’ebé mak sempre hamutuk ho organizasaun sira seluk hanesan CFHD ho Pradet sempre hamutuk halo sensibilizasaun informasaun ba ema ho difisiensia. Depois iha tinan 2017 hetan mós salariu konbustivel ema ho difisiénsia nian to’o ohin loron.
Iha altura ne’eba dalabarak feto ho defisiénte fiziku ne’e hetan mós liafuan estigmasaun husi komunidade sira, tanba ne’e dalaruma soke nia fuan no senti triste tebes ba sira-nia terminolojia sira ho liafuan estigmasaun oioin ne’ebé mak hasai ba nia no ba maluk difisiente sira seluk.
Sujere ba governu nafatin tau matan ba ema ho difisiensia sira, inklui mós prepara fatin ruma ba sira nune’e hodi halibur maluk difisiente sira hodi halo sira-nia servisu iha Munisiupiu Baukau. Husu mós ba parte relevante sira bele prepara mós fatin ne’ebé mak seguru no dignu nune’e bele hala’o negósiu. Parte seluk hakarak sujere mós ba komunidade sira katak, presiza uza terminolojia ne’ebé mak di’ak nune’e bele respeita mós ema ho difisiesia.
Reportajen : Ekipa Radio Liberdade
Discussion about this post