DILI,05_04_2023-Organizasaun Não Governamental (ONG) Fundasaun Pátria hamutuk ho Plan Internasional Kuarta ohin realiza atividade formasaun ba Média husi rádiu Komunidade sira ligadu ho divulga informasaun ho loloos ba públiku liu-liu eleisaun parlamentar tinan nee, ho tema “kolokidu ligadu ba capacity needs assessment papél média/radio Comunidade ligadu ho informasaun ne’ebé lalos relasiona elisaun jeral sira iha Timor Leste”.
Boar Fundasaun Pátria Filomena Dos Reis haktuir, objetivu husi formasaun n’ee atu buka hakle’an no foti tan abilidade kada instituisaun husin radio komunidade sira oinsá sai familiar iha involvementu refere hodi fahe informasaun ne’ebé loos no balansu iha públiku.
Board Fundasaun Pátria, Filomena Dos Reis
“Objetivu husi levantamentu ida ne’e ita buka haklean liu informasaun relasiona ho abilidade média la signifika katak ita boot sira laiha abilidade, maibé ita hakarak atu foti tan abilidade kada instituisaun hosi rádiu komunidade sira, tanba dezenvolvimentu ne’e la’o ba oin, ne’ebé ita tenke ajuda malu iha parseria oinsá bele hakbi’it malu hodi fó sai informasaun ne’ebé loloos ba públiku“, dehan Filomena dos Reis iha salaun Fokupers ohin, 05/04/2023.
No nia espera katak liu husi formasaun refere ajuda média sira atu halo reportajen kona-ba diretu umanu no igualidade jéneru ho inkluzivu.
“Ita ko’alia kona-ba direitu feto, ita nia maluk defisiénsia nia direitu, ita nia maluk LGBTI sira nia direitu, tanba ne’e husi rádiu komunidade sira ami fiar katak sei promove direitu umanu promove direitu igualdade, liuliu informasaun ne’ebé mak ko’alia liu kona ba igualdade jéneru no sensibilizasaun jéneru“, nia akresenta.
Nia hatutan, importante tebes ba média hanesan rádiu komunidade sira, presiza tranzmite informasaun ho edukativu tanba ko’alia ba tilun nune’e informasaun hanesan mós edukasaun sívika ba rona nain sira ligadu ho kampaña no eleisaun parlamentar tinan nee.
Nune’e mós reprezentante formandu husi Rádiu Comunidade Comoro, Humerto Alves agradese iha partisipasaun kolokiu ne’e tanba bele aprende oinsá halo kobertura ho balansu iha igualidade jéneru iha eleisaun parlamentar.
“Formasaun ne’e importante tebes ba jornalista sira wainhira atu hakerak nótisia ruma haree liliu kona-ba igualidade jéneru, nune’e ba oin jornalista sira atu entrevista karik tenki iha balansu, liuliu ba iha kampaña elisaun parlamentar tinan 2023 nian”, nia hakotu.
Partisipante iha formasaun ne’e mai husi Jestor/a ho menbru jornalista sira husi média rádiu privadu no rádiu Comunidade sira iha Dili no tuir planu Fundasaun Pátria sei kontinua tan formasaun ba média Rádiu sira hodi promove igualidade jéneru iha elisaun parlamentar iha loron 21 Maiu 2023.
Reportajen : Jovito Guterres & Veronica da Costa (Estajiadu UNTL)
Editor : Jonas
Discussion about this post