Ermera,22/02/2023-Timor-Leste tama ona ba tinan 21 hetan independensia maibé iha populasaun balun sei halerik hela ba dezenvolvimentu, hanesan komunidade iha Aldeia Laclo Suku Dukurai, Postu Administrativu Letefoho, Munisípiu Ermera ne’ebe oras ne’e halerik hela ba dezenvolvimentu liu-liu problema infraestrutura, tanba kondisaun estrada sai preokupasaun bo’ot ba komunidade iha suku refere no susar tebes ba sira atu asesu ba transporte públiku hodi tula sira nia produtu lokál ba iha merkadu.
Liu husi programa Média tour ne’ebé organiza husi OXFAM Timor-Leste servisu hamutuk ho AJTL hodi lori Jornalista sira ba Munispiu, nune’e identifika los duni katak, Komuidade sira iha Aldeia Laclo Postu Administrativu Letefoho Munispiu Ermera enfreta tebes ba problema kondisaun estrada no susar ba sira atu movimentu no ameasa tebes ba inan isin rua atu ba halo tratamentu iha sentru Saúde
Lurdes da Costa Gomes inan feton ida ho idade avansadu husi aldeia Laclo hatete, nia senti la seguru bainhira lori nia produtu ba fa’an iha merkadu, tanba distansia entre Aldeia Laclo ba Merkadu letefoho kuaze Kilomertu 30, nune’e iha tempu klimatika akontese udan fo impaktu tebes sira nia moris no dalaruma sira labele lori sira nia produtu ba Merkadu. Inklui mos sai preokupasaun bo’ot ba sira atu trata sira nia dokumetu.
“Ha’u hanesan komunidade ida sente la seguru bainhira halo movimentu iha estrada ne’ebé a’at no nakonu ho tahu, iha tempu rai udan entaun ida ne’e impaktu makas mai ami tanba udan loro-loron hela de’it halo estrada sai a’at liu tan no nakonu ho tahu no ami labele lori produtu lokal ne’ebe ami kuda iha kintal ba fan iha markadu. No mos fo impaktu ba inan isin rua inklui mos moras sira seluk ne’ebe mak akontese entaun ida ne’e hanesan preokupasaun ne’ebe boot tebes mai ami atu asesu ba sentru saude inklui mos atividade sira seluk hanesan urus ami nia dukumentu sira hanesan identidadae pesoal,” nia dehan ba jornalista sira iha sede suku Dukurai iha tersa ne’e 21/02.
Biban hanesan Autoridade lokál Francisco Dias Soares nu’udar xefi Aldeia Laclo haktuir katak durante nia mandatu observa iha aldeia refere komunidade barak mak preokupa tebes ho kondisaun estrada ne’ebé a’at, tanba iha tempu udan labele halo movimentasaun no difikulta mós komunidade sira labele lori produtu ba fa’an iha markadu inklui estudante sira labele ba eskola iha tempu udan.
“Maske kondisaun estrada a’at ha’u hanesan xefi aldeia servisu hamutuk ho xefe suku inklui mos komunidade sira hodi buka maneira seluk hodi rezolve lalais ba problema ne’ebe familia ida hasoru liliu ba inan isin rua sira atu partus inklui mós moras sira ne’ebe moras grave ,entaun ida ne’e ami tenke leba lori lao neneik ba to’o iha sentru saude letefoho, tanba saúde sira labele atende lalais ho transporte tanba impaktu husi kondisaun Estrada”, dehan Francisco.
Nia hatutan kondisaun estrada ne’ebé la di’ak impaktu direita ba ema vulneravél sira, liuliu isin rua tanba susar atu asesu hodi halo tratamentu iha sentru saúde no mos ba ema produtivu sira disifil lori sira nia produtu ba merkadu tanba distansia entre komunidade aldeia Laclo ba merkadu lefeteho do’ok tebes, maibé hanesan autoriedade buka meius hodi tulun komunidade sira ne’ebé prezisa tulun iha tenpu susar.
Ho preokupasaun hirak ne’e Xefi suku Dukurai Rafael Soares Maia hatete, sira hato’o ona asuntu hirak ne’e ba iha parte relevante iha tinan 2020 no iha tinan ida ne’e sira foin hetan resposta katak tempu badak Governu liu husi Minesteriu Obras Públikas orienta ekipa hodi tun ba hare’e atu responde ba problema ne’ebe komunidade sira hasoru iha iha tinan ne’e. no nia dehan Maioria komunidade iha suku Dukurai, moris nu’udar vida Agrikutura nune’e sira presiza tebes Governu nia tulun atu hadia estrada ne’ebé a’at atu bele fasilita sira lori produtu lokal ba Merkadu atu responde ba ekonómia familia nian.
Total uma kain iha Suku Dukurai hamutuk (1.249) ho nia populasaun (6.211) kompostu husi feto (3.052) no mane (3.159) mai husi aldeia (13) no husi numeru ne’e ema ho difisiensia iha nain (26).
Husi dadus no informasaun ne’ebe jornalista hetan tanba tuir Programa ne’ebe realiza husi OXFAM Timor-Leste no Assosiasaun Jornalista Timor-Leste (AJTL) servisu hamutuk Organiza Media Tour hodi halo kobertura ba asuntu mudansa klimatika liga ba iha infrastrutura kondisaun estrada aat iha Munisipiu Ermera Postu Administrativu Letefoho suku Dukurai Aldeia Laclo.
Jornalista : Natalina de Araújo
Editor : Natalino Ximenes
Discussion about this post