Dili – Maske loron manas maibé nu’udár agricultór Joȃo Manuel da Silva Guteres la haksumik no habai an ba loron manas hodi prepara nia kantreru atu kuda modo wainhira dadalia ho jornalista Radio Liberdade iha nia to’os iha Hera, Dili.
Guterres hatete, nu’udar Aman ba oan na’in haat (4), nia tenke servisu maka’as hodi kuda modo no fa’an atu selu oan sira nia eskola no sustenta nesesidade uma laran nian.
Ba Radio Liberdade iha Sabadu liu ba, João Manuel da Silva Guterres, haktuir prosesu kuda modo no aihan seluk iha ninia to’os.
“Atu halo modo fatin [kantreru], primeiru ha’u fila rai no suru sai fali modo fatin, depois riska hodi kari fini sira, no kada fini, ha’u bibit [kuda] ketak-ketak, no fini sira nee ha’u rega loron ida dala tolu (3), no antes kari fini ha’u mós prepara hela modo fatin [kantreru] ne’ebé mamuk hodi kuda fila-fali fini ne’ebe bibit [moris] ona,” nia dehan.
Durante ne’e, João Manuel da S. Guterres kuda modo no hudi, no wainhira koilleta, nia lori ba fa’an iha merkadu hodi hetan osan atu responde ba nesesidade familia nian.
“Maske produto ne’e la hetan lukru barak maibé ha’u mós maneza tuir lukru ne’ebé iha hodi sosa hahan no fasilita oan sira nia eskola. Ha’u depende liu ba moris nu’udar agrikultór, entaun tenke servisu maka’as iha area modo fatin hodi hetan netik lukru oituan hodi aguenta nafatin moris ne’e,” Manuel dehan.
Martina Soares nu’udar feen kaben hatete nia sempre fó suporta maka’as ba nia laen liu husi ajuda fila rai, rega modo, kolleta no mós lori ba fa’an iha merkadu hodi bele ajuda nesesidade baziku uma laran nian.
“Ha’u sente orgullu tebes ho situasaun ne’ebé mak ami enfrenta iha uma laran tamba dala ruma mós ami fa’an produtu ladun hetan lukru ne’ebé di’ak entaun ami nia osan la sufisiente hodi sosa hahan ne’ebé ho nutrisaun. Dala ruma mós ami konsumu hahan tradisional hanesan marotok, tau fós ho ai-farina tahan no hudi nia isin ami tein hamutuk tia hodi konsumu depois kontinua nafatin ami nia servisu hanesan loron babain,” Martina dehan.
Iha sorin seluk, Domingas Soares nu’udar oan primeiru husi Joȃo no Martina dehan maske situasaun ekonomia uma laran nian la sufisiente, maibé nia mós nafatin kontinua ho nia estudu no dadaun ne’e nia hala’o estudu iha Instituto CRISTAL, Departamentu Enfermajen no iha semester tolu (3) ona nia mós sempre fahe tempu hodi ajuda inan-aman halo modo fatin (kantreru).
“Ha’u mós agradese ba inan-aman tanba ho situasaun ekonomia uma laran nian la sufisiente, maibé sira nafatin buka meius oin-oin hodi sustenta uma laran no selu eskola no ha’u mós esforsu an hodi sai ema ne’ebé maduru no susesu iha futuru hodi hanoin fila-fali ba inan-aman nia sakrifisu ne’ebé halo mai ha’u maske la selu ho rikusoin maibé ha’u espera katak sei halo sira kontente ho ha’u nia estudu ne’e,” Domingas dehan.
João husu ba parte relevante sira tenke tau atensaun ba sira nu’udar agrikultór, liu husi fó fini ba sira atu buka moris tanba agrikultor oan sira presiza tebes fini hodi ajuda sira nia ekonomia uma laran no selu oan sira nia eskola.
Jornalista: Natalina de Araujo no Ana Soares
Editor: Fernanda Maria
Discussion about this post