DILI – Maske ho kondisaun ne’ebé difisiensia, Elvis Oliveira hala’o atividade negosiu hodi sustenta nia familia. Elvis Oliveira ne’ebé moris iha Lospalos iha tinan 48 liu ba, iha feen no oan na’in haat (4) ne’ebé nia persija suporta loro-loron.
Wainhira dadalia ho Ekipa Radio Liberdade iha Largo Lecidere, Dili, Elvis Oliveira haktuir konaba moras ne’ebé mak halo nia sai defisiente.
“Momentu ha’u moris mai, ha’u ho kondisaun ne’ebé mak saudavel no normal, maibé to’o fulan sia (9) moras ne’e foin akontese mai ha’u. Ha’u la hatene moras ne’e mai husi ne’ebé no laiha ema ida mak atu detekta moras ne’e,’’ nia dehan ba jornalista Radio Liberdade iha Jardin Largo, Quinta-Feira (18/08/2022).
Durante ne’e, Elvis fa’an kupn SDSB no máscara, no kada loron nia manan osan $8, maibé dalaruma kliente sira ne’ebé sosa nia kupon SDSB, manan, entaun sira fó osan ba nia $30 ka $40.
“Maske ema ladun sosa máscara no SDSB, maibé ha’u la baruk atu hala’o atividade negosiu ne’e no ha’u agrasede liu tan ba kompradores ne’ebé mak sosa ona ha’u nia máscara no SDSB, tuir ha’u nia sentimentu ema ne’ebé sosa ha’u nia sasan dalaruma mos sira hanoin ha’u,” Elvis dehan.
Bendita Eko, nu’udar feen kaben, hatete nia sente orgullu tebes ho nia kaben nia esforsu tomak, maske ho kandisaun fizíku ne’ebé la permite, nia sempre buka meius hodi sustenta nia familia.
“Ha’u mós sempre ajuda ha’u nia parseiru, liu husi soru tais, fa’an hodi buka osan atu nune’e bele ajuda ha’u nia parseriu bainhira iha situasaun difisil nia laran liu-liu iha nesesidade baziku,” Eko dehan.
Hanesan ema ho defisiensia, Elvis Oliveira haktuir, durante ne’e nia la simu subsídiu ruma husi Governu hanesan ho nia maluk defiensia sira seluk.
Elvis Oliveira deklara katak nia forma familia iha 2014 no hela iha uma kontratadu ou kós to’o agora tanba nia forsa la to’o atu halo uma ba nia familia.
Nune’e, nia husu ba Governu atu bele kria fatin ho kondisaun di’ak ida ba nia hodi bele hela hakmatek no buka moris hodi sustenta familia.
“Ha’u mos la haluha fo agradese ba belun estranjeiru sira ne’ebé mak ajuda ona ha’u iha tempu uluk no mós ba belun sira hotu ne’ebé mak ajuda ona ha’u no ha’u labele sita ida por ida, ha’u nafatin fo obrigadu liu husi ha’u nia orasaun ba imi hotu,’’ nia deklara.
Nia enkoraja maluk seluk ho defisiensia katak labele moe ho kondisaun ne’ebé mak iha hodi buka osan ba moris. Tuir nia moris ne’e hanesan milagre ida.
Discussion about this post