Radio, online – Prezidente Repúblika (PR) José Ramos Horta iha Segunda no Tersa Feira (21-22 / 2011) semana ne’e, hala’o vizita ba distritu Ermera hodi hala’o dialogu ho komunidade sira iha sub distritu Ermera Vila, Hatolia no sub distritu Letefoho. Iha dialogu ne’e PR Horta enkoraza povu TL partisipa eleisaun jeral 2012.
Iha diàlogu iha fatin tolu refere Xefi Estadu husu ba populasaun sira atu kaer metin unidade no harmonia iha sosiedade nia le’et hodi kria nafatin estabilidade hodi hasoru festa bo’ot ne’ebe governu planeia ona iha tinan 2012 hanesan, selebrasaun tinan sanolu restaurasaun indepedensia, selebrasaun tinan atus ida funu Manufahi kontra kolonialismu Portugès, tinan atus lima Portugal mai iha Timor, no preparasaun ba eleisaun jeral 2012.
“Ita nia dezenvolvimentu atu la’o tenki iha dame no estabilidade, krize iha tinan 2006 sobu buat barak, halo nasaun hakiduk ba kotuk, tamba ne’e ha’u husu ita labele monu hikas ba krize 2006, ita tenki selebra festa bo’ot iha tinan 2012 ho dame, rekonsiliasaun no unidade.” apelu Prezidente Horta.
Xefi Estadu mos husu ba komunidade sira atu lalika soe votus arbiru, atu nune’e iha eleisaun jeral tinan 2012, partidu ida bele hakat ba maioria parlamentar nune’e bele halo governasaun ne’ebe di’ak. Prezidente Repúblika mos senti haksolok tamba iha tinan sira ikus ne’e violensia iha distritu Ermera menus ona kompara ho tinan 2006 to’o 2007.
Iha biban ne’e, komunidade sira mos hato’o sira nia prekupasaun kona-ba kondisaun estrada, elektresidade, sistema edukasaun, folin husi neseidade baziku ne’ebé sa’e maka’as, no kestaun seluk-tan.
Diàlogu ho tema “Dalan ba Dame no Unidade Nasional” ne’e nu’udar programa ida ne’ebe sempre hala’o husi Prezidente Ramos-Horta iha ninia mandatu ho objetivu atu hametin dame no unidade iha povu nia le’et.
Distritu Ermera ho luan 746 km2, ho distansia 58 km iha Parte Sudeste kapital Dili, nudar distritu daruak ne’ebé ho numeru populasaun bo’ot liu hafoin Dili. Distritu ne’e iha total habitantes 114,635 pesoas (tuir dadus husi sensus 2010) no sai nudar distritu ne’ebe ho produsaun kafè as-liu iha Timor Leste.
Discussion about this post