Radio, online – Estudante ho sexu feto husi 28 de Novembru mate tara-an iha Bidau tahu laran, suku Bidau, Sub-Distritu Kristo Rey, Distritu Dili. Estudante ne’e sei tur iha banku sekundaria klase II.
Tuir sasin balu dehan mate tara-an ne’e kuaze madrugada tuku 3 otl, Sesta (17/6).Mate tara-an ne’e halo komunidade Bidau tahu laran hakfodak no paniku hotu.
Ema barak mak halai ba hare mate isin ne’ebe sei tara-an hela. Mate tara-an ne’e matebian kesi iha uma oin mak hodi tara nia an.
Tuir informasaun iha tereinu, estudante ne’e tara-an ho kondisaun isin rua. Iha sasin balu mos ne’ebe ba hare dereitamente iha fatin dehan ho kondisaun isin rua ne’e, maske inan mate ona maibe bebe mak iha kabun laran sei bo’ok an hela.
Estudante feto ne’e mate ho kalsa badak, fuk kesi hela. Hare ba fiziku husi matebian ne’e, inan feto ninia idade maizumenus sei iha tinan 18.
Hare ba kondisaun mate ne’ebe mak kleur ona, komunidade balu informa ba polisia. Iha oras tuku 8:15 0tl polisia mai iha fatin ne’e hodi mai foti mate isin ba iha ospital, hodi halo outopsia. Liu husi dalan ne’e mak bele hatete lolos motivu husi mate misteriu ne’e.
To’o notisias ne’e hatun, jornalista sei tenta nafatin konfirma ho parte saude nian no polisia hodi hatene lolos motivu husi mate tara-an ne’e.
Discussion about this post