Radio, online – Prezidenti Parlamentu Nasional Fernando Lasama de Araujo husu no apela ba Prezidenti Estadu Unidas da America (EUA) Barack Obama husik livre tiha aktivista Cubano nain 5 ne’ebe agora dadaun detein hela iha prizaun Guantanamo.
Lasama kasu lia hirak nee iha nia diskursu iha serimonia enseramentu ba programa analfetismu iha Distrito Manatuto Sesta (4/6) foin lalais ne’e.
EUA kaer aktivista nain 5 ne’e iha fronteira entre Miami ho Cuba. Ho ida ne’e mak EUA hatete dehan sira nain 5 ne’e terorismu. Maibe to’o agora aktivista ne’e seidauk iha justifiksaun legal dehan sira involve iha rede terorismu.
“Hau husu ba Obama husik livre aktivista Cubano nain 5 tanba sira laos terorismu. Sira ema aktivista lori dame nain. Hau fo parabens ba Obama konsege hamate Osama Bin laden hanesan terorismu nia bo’ot,”Lasama apela.
Tuir Lasama mundu agora iha dame nia laran ona, tanba EUA konsege hamate terorismu nia ulun bo’ot no ninia rede sira. Lasama lori povu Timor Leste nian naran fo obrigadu ba EUA konsege kontrola seguransa mundial liu husi rede terorismu.
Embaixador Cuba mai TL Ramon Hernandez Vazguez iha fatin ba radio online hatete katak, povu Cubano problema ho EUA laos tanba terorismu. Cuba hakribi violensia. Tuir nia, los duni nasaun Cuba ho EUA iha problema nanis tanba deit odeologi la hanesan. Cuba kaer dutrina Sosializmu no EUA kaer dutrina Kapitalizmu.
“Ami laos ema terorista, ne’e duni hau hamutuk ho povu TL husu ba Obama husik livre ami nia ema ne’ebe sulan iha komarka nein justifikasaun klaru,”dehan Ramon.
Discussion about this post