Radio, online – Labarik barak mak lakon sira nia direitu tanba ekonomia uma laran obriga sira hodi halo servisu bele sustenta nesesidade uma laran.
Tuir Lamberto Moniz (10) ne’ebe mak lor-loron fase kareta iha Rotunda Lafatik Comoro katak fase kareta ne’e bele ajuda inan aman tanba inan aman mos laiha kbit haruka ami eskola hotu.
“Hau sai eskola iha Primaria klase III tanba inan aman mos la interese ona ami, tanba ami hamutuk hitu (7) mane tolu no feto haat hau mak hanesan oan ikun” dehan Lambertu iha Rotunda Lafatik Comoro, kinta 02/6.
Lamberto hatutan katak fase kareta ne’e loron ida nia hetan $ 4.00 to’o $ 5.00 dollar, depende kareta sira ne’ebe mak mai fase.
Joao Moniz no Maria da Costa informa katak fase kareta ida $1.00 dollar balun fo deit $ 0.50 cent.
Inan aman sira obriga oan sira halo servisu halo negosio, tanba moris uma laran mak obriga duni sira tenke halo, ne’e mak realidade ita hare labarik barak Fase kareta, fa’an manu tolun, fa’an pulsa, fa’an sigaru no buat seluk tan. (Maria Bibel Internship)
Discussion about this post