Dili-19/11/2024- Asosiasaun Jornalista Timor-Leste AJTL servisu hamutuk ho OXFAM iha Timor-Leste Organiza Media Tour ba Media sira atu halo Kobertura ba Problema Mudansa Klimatiku ne’ebé Komunidade sira enfrenta iha Munisipiu Ermera Postu-Administrativu Letefoho.
Acacio Pinto nu’udar sekretariu jerál AJTL informa katak ohin AJTL hamutuk ho média 15 sei halo Media Tour dala ida tan iha Letefoho, AJ TL parseria ho Oxfam iha Timor-Leste no apoiu fundus husi Oxfam Hongkong. Objetivu husi Media Tour ne’e sei foka liuba mudansa klimatika. Tanba ita hotu hatene katak, Ermera maioria moris ho kafé, entaun liuhusi kobertura ne’e antes ne’e ami halo ona brifing ho kolega jornalista sira atu identifika issu liga ho mudansa klimatika ne’ebé mak ita-nia inan aman sira iha Letefoho enfrenta.
Iha Konferensia ne’e, Adilson da Costa Junior reprezentante husi Oxfam mós hateten, programa media tour ne’e hanesan programa ne’ebé mak regular, tanba ne’e Oxfam iha Timor-Leste servisu hamutuk ho Asosiasaun Jornalista Timor-Leste AJTL iha tinan hirak liuba ita halo ona, no agora ita kontinua ba tinan ida ne’e, nomós ba tinan oin programa media tour ne’e ita hanoin katak importante tebes hodi jornalista sira bele halo kobertura kona-ba asuntu importante sira ne’ebé mak dalabarak ita-nia maluk no ita-nia komunidade sira enfrenta iha area rurál. Hanesan ita hatene katak informasaun hotu-hotu dalaruma iha Dili de’it, entaun ita lakon informasaun barak ne’ebé ita-nia maluk ema ho difisiensia no feto inklui grupu vulneravel sira hela iha area rurál ne’eba enfrenta hela.
“Ita hanoin katak programa media tour ba dala tolu, tinan ne’e ita desidi halo iha munisipiu Ermera parte Letefoho, antes media tour ne’e akontese ita servisu hamutuk ho jornalista husi media 15 ne’ebé hola parte iha programa media tour ne’e, hodi halo brifing no diskusaun kona-ba asuntu ka issu tematiku ne’ebé mak kolega sira sei halo kobertura durante loron rua iha Letefoho, no asuntu importante balu ne’ebé ita ko’alia iha media brifing ne’e rasik mak ko’alia kona-ba impaktu mudansa klimatika ba produsaun agrikultura, nomós liuliu ba produsaun kafé, inklui mós asesu ba bee nomós infranstrutura baziku sira seluk”.
Momentu ne’e Adilson esplika Oxfam hanoin katak media tour ne’ebé sei hala’o durante loron rua iha Letefoho bele explora barak liutan kona-ba saida mak komunidade sira enfrenta no saida mak maluk difisiensia inklui maluk vulneravel sira enfrenta liga ho impkatu mudansa klimatika ne’e rasik iha sira-nia moris nune’e mós iha atividade loro-loron nian hanesan atividade agrikultura, asesu ba bee, no iha buat seluk husi matenek lokál ne’ebé iha.
“Oxfam espera katak, kolega jornalista sira hamahan aan iha AJTL sei halo investigasaun ne’ebé kle’an liutan hodi halo kobertura di’ak husi komunidade sira, bele fahe mós ba públiku tanba ita hanoin katak, depois de informasaun no evidensia sira ne’e públika husi jornalista sira, ita espera ukun-na’in ka governante sira ne’ebé dadaun ne’e diskute hela proposta orsamentu 2025 nian, bele konsidera mós asuntu mudansa klimatiku nian, asuntu agrikultura, no asuntu seluk ne’ebé bele kontribui ba komunidade sira-nia moris.
Partisipa iha media tour ne’e husi media hamutuk 15 mak hanesan, Neon Metin Sap News Indepedente Media Mudansa, Tatoli Tv- Edukasaun Labeh Media One Timor, iha mós Rttl Dili Post Timor Post, Diligente nomós Media Democrasia, Radio Liberdade inklui Media Guarda Mor. Atividade media tour ne’e hala’o tanba AJTL parseria ho OXFAM iha Timor-Leste hetan apoiu orsamentu husi Oxfam iha Hongkong.
Jornalista Maria de Rosa
Discussion about this post