𝐎𝐱𝐟𝐚𝐦 𝐓𝐋-𝐀𝐉𝐓𝐋 𝐑𝐞𝐚𝐥𝐢𝐳𝐚 𝐊𝐨𝐦𝐩𝐞𝐭𝐢𝐬𝐚𝐮𝐧 𝐅𝐨𝐭𝐨 𝐊𝐨𝐧𝐚-𝐛𝐚 𝐌𝐮𝐧𝐝𝐚𝐧𝐬𝐚 𝐊𝐥𝐢𝐦á𝐭𝐢𝐤𝐚.

Dili, 23/09/2024, Asosiasaun Jornalista Timor-Lorosa’e- AJTL servisu hamutuk ho Oxfam Timor-Leste, realiza kompetisaun fotografer ba joven sira iha talentu fotografia liu-liu kona-ba justisa klimátika ne’ebé mak akontese iha Timor-Leste.

Alende realiza kompetisaun fotografia, anúnsia mós rezultadu ba manan nain fotografer no entrega mós sertifikasaun ba kompetetor sira.

Prezidenti AJTL Zevonia Viera hateten, Asosiasaun Jornalista Timor-Lorosa’e, hetan fiar ba tinan ida nian, halo kompetisaun foto hodi advokasia liga ho sistema klimátika iha Timor, tanba ne’e mak AJTL anunsia ona manan nain tolu no manan nain primeiru sei ba halo kompetisaun iha Beijin China hodi tuir kompetisaun liga ho sistema klimátika.

“Manan nain primeiru lugar sei reprezenta Timor ba partisipa iha Beijin China iha fulan Novembru tinan ne’e, hodi aprezenta nia foto no istoria sira kona-ba impaktu mudansa klimátika iha Timor oinsa nia impaktu grupu vulneravel sira liu-liu feto no labarik, ferik katuas, inklui ema ho defisensia sira, nune’e bele halo adaptasaun iha China” dehan prezidente Zevonia.

Prezidenti AJTL ne’e deklara ba públiku katak kompetisaun ne’e nakloke ba ema hotu liu-liu ba joven ne’ebé iha talentu fotgrafia no liu husi kompetisaun ne’e bele motivu diak liután atu bele halo produsaun imajen sira ne’ebe ligadu ba ema nia moris ka mudansa klimátika.

Jestór ba programa Advokasia no Influensia iha Oxfam Timor-Leste Adilson da C. Junior hatutan, programa kompetisaun foto ne’ebé hamutuk ho AJTL organiza ne’e parte ida husi projetu media no organizasaun sosiedade sivil ne’ebe servisu ba asuntu mudansa klimátika alende envolve jornalista sira iha projetu ida ne’e mos fo oportunidade ba joven sira ne’ebe mak iha kreatividade ka talentu iha fotografia tanba ne’e nafatin kontinua promove sira.

“Servisu kolaborasaun Oxfam Timor- leste ho Oxfam iha Hongkong liu husi apoiu fundus mai Oxfam Timor-leste, hodi servisu hamutuk ho AJTL ba programa kompetisaun ida ne’e. Ita hanoin katak joven ne’ebe ohin sai hanesan manan nain ba kompetisaun fotografia ida ne’e nia bele reprezenta joven sira iha Timor hodi partisipa expozisaun iha Beijin hodi aprezenta rezultadu fotografia tuir nia kontextu,” Hateten Adilson.

Manan nain ba Kompetisaun Fotografia, Martino Gonsalves Araújo hateten, husi kompetisaun ne’e rasik motiva nia atu sai fotografia ne’ebe diak iha futuru, tanba fotografia hanesan arte ida hodi deskreve realidade ne’ebé atu halo eskenaria ida ba situasaun ohin loron.

“Ohin ha’u konvida joven sira iha Timor-leste hodi explora sira nia talentu fotografia no sira hatene kona-ba mudansa klimátika tanba ita hotu tenki hatene konaba mudansa klimátika, tanba ne’e iha oportunidade ida ne’e há’u sei ba iha Beijin China hanesan reprezenta foinsa’e sira iha palku Internasional‘’dehan Martino ba jornalista sira iha Oxfam.

Nia relata katak kriteriu husi kompetisaun ne’e rasik ba iha China aplikante sira sei hatudu nia obra fotografia tuir kriteira husi Oxfam hodi relata situasaun klimátika Timor-leste nian, entretantu nia mos husu ba foinsa’e sira uza nafatin talentu fotografia hanesan, valor ida di’ak hodi ba kompete iha mundu Internasional, atu bele reprezenta klimátika Timor nian iha mundu nia matan.

Oxfam Timor-leste kontinua servisu hamutuk ho Oxfam iha Hongkon atu nafatin fo oportunidade ba joven sira atu promove liutan sira nia talentu fotografia no bele dezenvolve sira nia abilidade ka sira nia koñesementu iha mundu fotografia.

Oxfam Timor-Leste mos kontinua servisu hamutuk ho AJTL hanesan parseiru estratejiku ba Oxfam atu esplora joven sira no hare liu ba problema mudansa klimátika.

Programa ne’e kolaborasaun entre AJTL ho Oxfam iha Timor-leste no hetan apoiu fundus husi Oxfam iha Hongkon.Total kompetetor nain 9 feto ida, no sai manan nain tolu, iha klasifikasaun I, Klasifikasaun II no Klasifikasaun III. ho prezente ne’ebe mak hanesan Telemovel ho marka samsung ho folin $400.

𝗝𝗼𝗿𝗻𝗮𝗹𝗶𝘀𝘁𝗮 𝗡𝗮𝘁𝗮𝗹𝗶𝗻𝗮 𝗔𝗿𝗮ú𝗷𝗼
𝗘𝗱𝗶𝘁𝗼𝗿: 𝗡𝗮𝘁𝗮𝗹𝗶𝗻𝗼 𝗫𝗶𝗺𝗲𝗻𝗲𝘀