Selegua- 09/08/2024- Eskola Filiál Selegua harii iha tinan 2009 to’o agora sei nafatin hasoru problema fasilidades eskola nian no sira hato’o ona ba parte relevante maibé to’o agora seidauk iha resposta ne’e hasoru problema menus fasilidade, profesores no fó impaktu ba estudante sira durante tuir prosesu aprenijajen iha munisípiu Baucau postu Administrativu Laga suku Sagadati aldeia Selegua .
Tuir profesora EBF Selegua Terezinha Gusmão hatete katak, eskola ne’e tanba ne’e prejudika tebes ba estudante sira nia prosesu aprenijazen iha eskola menus tebes nesesidade ba sira bainhira tuir aula iha eskola. Aliende fasilidade sira mós menus bee hodi tein merenda eskolar ba estudante sira. tanba ne’e, obrigatoriamente dader antes estudante sira hahu aula tenke kuru bee uluk ho distansia ne’ebé dook hodi lori ba te’in hafoin hahú tama aula.
“Problema ne’ebé ami ho estudante sira enfrenta mak menus fasilidade hanesan la iha haris fatin, meza kadeira la sufisiente, la iha bibleoteka, falta sala de aula ba estudante, bee matan dook husi eskola, inklui menus profesores hodi hanorin estudante sira tanba ne’e husu ba governu liuliu ba Ministeriu Educação atu ajuda ami-nia eskola no bele hadia sala de aula ba estudante tanba sala ne’ebé durante estudante sira uza hamutuk sala tolu, tanba ne’e la sufisiente ba estudante hodi hala’o prosesu aprenizajen ho di’ak no fó prejudika ba estudante sira,” dehan Terezinha ba jornalista sira bainhira hala’o Media Tour iha Laga Sagadati.
Iha sorin seluk autoridade lokál xefe aldeia Selegua Alexo Belo Pereira haktuir, durante ne’e observa katak, eskola existe iha aldeia Selegua difikuldade barak mak estudante no profesores sira esfrenta nune’e nu’udar parte autoridade ho inan aman no klibur Estudante Joventude suku Sagadate (KEJUSS), sira voluntariamente iha inisiativa rasik hodi halo eskola sala tolu dapur ida ba estudante sira.
“Eskola EBF Selegua la’os de’it hasoru problema ba aula, maibé sira mós hasoru problema laiha bee moos no governu la tau importansia ba estudante sira, nune’e parte autoridade lokál no grupu husi klibur estudante Juventude suku Sagadati (KEJUSS), mak esforsu hodi dada bee matan ba estudante sira, maibé kuandu iha tempu bailoron bee maran no afeta ba estudante sira tenki la’o dook hodi kuru bee ba tein merenda eskolar hafoin sira hahu aula” konta tuir xefe aldeia Selegua
Aliende ne’e, xefe aldeia mós rekomenda ba governu liuliu ministériu relevante atu tau matan netik ba estudante, tanba sira mak sai hanesan futuru ba nasaun ne’e nian. Problema seluk tan mak menus profesores hodi hanorin estudante sira no eskola refere iha profesores kontratadu na’in rua no voluntariu na’in ida, profesores kontratadu na’in rua durante oitavu governu simu saláriu mais nono governu sira la iha saláriu. Eskola EBF Selegua iha sala tolu hahu husi klase 1- 4 ne’ebé lokaliza iha sentru nune’e estudante asesu husi Aldeia tolu husi aldeia Selegua, Onebu’u, no Lalulai, total estudante 46 feto 18 mane
Discussion about this post