Fasilidade Dezemvolvimentu Merkadu (MDF) ho Asosiasaun Hotél Timor Lorosa’e, kompostu husi representante hotél no akomodasaun sira iha Timor-Leste, organiza eventu ho naran ‘Produtu Foun Inovativu iha turizmu. Eventu ne’e fó oportunidade ba kompañia lokál atu aprezenta sira nia inovasaun sira iha setór turizmu, ho objetivu atu hametin koneksaun no promove dezenvolvimentu turizmu iha Timor-Leste.
Empreza sira ne’ebé partisipa iha eventu ne’e hamutuk 15 iha área supplier no reseller hanesan, Balibo Fouth Hotel, Dili delicious, Pro-Ema, Realoka Timor, Suku Creativu Aileu, kompania Telekomunikasaun Telemor, BNU, Mission Aviation fellowship Timor-Leste (MAF), Timor Motobike and Rent, Leste mineral no seluk tan.
Eventu ne’ebé realiza iha Timor Plaza ne’e kada empreza intruduz sira nia produtu, aktividade no esperiénsia serbisu turizmu foun ba parseiru sira seluk atu promove ba turista sira ne’ebé vizita Timor-leste. Produtu Ida maka iha fulan janeiru liu ba Banku BNU lansa pakote uza master Card Iha Timor-Leste hodi fasilita turista ne’ebé uza Marter card bele dada osan iha Automated Teller Machine (ATM) BNU nian.
Jeremiah Chan, Prezidenti Asosiasaun Hotels Owners Timor Lorosa’e (HOTL), hatete katak eventu ne’e hanesan eventu dahuluk ne’ebe organiza hodi promove pakote turizmu ba turista sira ne’ebe vizita Timor-Leste.
“Eventu ohin hanesan introdusaun ba produtu sira ne’ebé iha ligasaun ho turizmu no ida ne’e dahuluk ne’ebé ami realiza atu lori vendor sira hasoru malu hodi estabelese rede entre vendor sira no intruduz produtu foun inovativu ba setor turizmu atu promove Timor-Leste sai destinasaun tuiristiku iha mundu”. Tenik Chan
Nia haforsa liután Timor-Leste hanesan fatin destinasaun turistíku maibé durante ne’e tuirsta sira lahetan informasaun kona-ba Timor tanba sei menus iha promosaun.
Iha fatin hanesan Business Adviser husi MDF, Favio Carvalho, salienta liután katak MDF, iha komitmentu hodi kontinua suporta no fasilita setór privadu sira ne’ebé iha ideia inovativu ba promove setor turizmu iha Timor-Leste.
“MDF, prontu suporta no fasilita setór privadu sira iha Timor-leste ne’e promove setór turizmu ,agora dadaun MDF asina MoU ho Hotels owners Timor Lorosa’e bainhira sira iha aktividade ne’ebe alina ho objetivu husi MDF nia ami prontu suporta” tenik Carvalho
Olivia xavier Amaral, husi Pro Ema senti kontente tanba hetan oportunidade hodi promove produtu Pro-Ema nian ba vendor sira seluk atu kunese liu tan pro-Ema nia produtu ka services.
“Ha’u kontente partisipa iha eventu ne’e ami bele promove, Pro-Ema nia produtu foun, ami iha Fabrika Chocalate ne’ebé hanaran “Mehi Kakau”.
Discussion about this post