Dili, 08-04-2024_Sekretaria Estadu Toponomia ho ekipa konjunta guarda Munisípiu Dili akompaña husi membru PNTL no Polísia Militar halo eviksaun ba negosiante sira iha Eis Merkadu Komoro.
Eviksaun iha loron 08/04/23 ne’e ba badala tolu ona, dahuluk iha tinan 2012 ne’ebé muda negosiante husi merkadu Komoro ba merkadu Manleuana maibé negosiante sira deside kontinua faan iha Eis mekadu Comoro.
João da Costa negosiante ne’ebé faan faan modo iha merkadu Komoro desde tempu okupasaun Indonesia informa katak antes ne’e sira la iha informasaun katak ohin governu liuhusi Sekretaria Estadu Asuntu Toponomia no Organizasaun urbana ho ekipa konjunta halo eviksaun ba merkadu nune’e sira kontinua halo aktividade negosiu hodi responde ba nesesidade ekonómia família.
“sira nonok la avizu ohin derepente de’it mai sobu, se sira dehan fo hatene ami ne’e sira manipula de’it informasaun, ami nia sasan balun sira estraga hotu no sasan balun soe deit hanesan ne’e ami ba tau los iha ne’ebé, hatudu mai nune’e atu ami bele kontinua buka moris” Tenik Vendor João
Nia informa liu tan katak razaun nia kontinua faan iha merkadu Comoro tanba bainhira dada rifa nia hetan fatin iha Merkadu Manleu nune’e nia deside kontinua faan iha merkadu Komoro hodi hein informasaun husi governu konaba fatin hodi nia kontinua halo nia aktividade negósiu.
Negosiante feto ne’ebé la fó identidade hateten informasaun hanesan katak antes ne’e laiha informasaun no durante nia la hetan avizu katak sira sobu maibé derepende de’it sira atu halo evikasaun ba merkadu nune’e halo negosiante sira hakfodak no preokupa de’it sira sasan.
“sira mai ho forsa ami ami povu kiik laiha kbi’it atu hatan, bainhira hatan soe tempu atu ko’alia hasoru sira, sira seluk sei estraga ami nia sasan entaun ami preokupa atu salva de’it ami nia sasan sira no ohin ami maluk hatan oknum Polísia balun ameasa ami nia maluk negosiante mane ida no feto ida no ami halo video tanba sira bandu ami atu halo video” Tenik negosiante ne’e.
Iha fatin hanesan SEATOU, Germano Santa Brites Dias, informa katak durante ne’e sira avizu komesa iha iha Setembru fulan tinan 2023, hahú iha fulan janeiru husi parte jestaun merkadu avizu atu la okupadu estrada hodi faan sasan maibé negosiante la kopera no hakarak koko governu nia forsa.
“ohin governu halo serbisu fulan sira iha terenu, ami sempre avizu bebeik, atu labele okupa estrada públiku maibé negosiante sira hakarak koko governu nia forsa entaun ami ekipa konjuta tanba ami hetan keixa beibeik katak lokraik sempre engrafamentu iha fatin ida ne’e” tenik nia
Nia informa liután katak nia ho ekipa konjuta halo eviksaun bazeia dekretu lei artigu númeru 38/2008 konaba ijéne no ordem públiku.
Reportajen : Dhesy Reis
Discussion about this post