Dili-Dalaruma sosiedade haree feto hanesan kbit-laek ida. Maibé ida-ne’e sai hanesan mitu ida ne’ebé ohin-loron la reprezenta feto sira nia moris. Tanba ohin-loron, feto barak mak moris independete tuir sira nia kapasidade no esforsu ne’eb’e sira iha. Pelumenus moris hosi joven Domingas da Silva Gonçalves hatudu realidade ida-ne’e, liuhosi atividade ne’ebé nia hala’o nu’udar xefe redasaun iha Rádiu Komunidade Komoro (RCC, sigla Portugés) no ao mesmo tempo sai hanesan vendedora ambulante.
Amica, naran estimadu hosi Domingas, estudante finalista Departamentu Comunicação Social iha UNTL, sai nu’udar xefe redasaun ba RCC nia aplika matenek no koñesimentu oioin ne’ebé nia hetan hosi universidade, hodi prepara nia an ba futuru iha área komunikasaun.
Maibé Amica mós hala’o servisu nu’udar vendedora ambulante ida hodi sustenta ninian nesesidade iha família liuhosi fa’an produtu sira ne’ebé fasil ba ema atu sosa lalis.
“loro loron hau nia atividade bainhira livre husi kampus mak faan sasan sira hanesan bee, sigarru, bebidas açucaradas, no selseluk tan, ida ne’e ajuda tebes hau nia nesesidade eskola nian hanesan selu kareta ba eskola no uza hodi print materia” dehan Amica.
Nu’udar oan dahaat hosi maun-alin hamutuk na’in hitu(7), Amica hahú ona atividade negósiu dezde nia tuur iha ensinu báziku iha dalan ninin Tasitolu nian.
Hosi atividade venda ne’e, Amica loron ida bele asegura osan entre $50-$60 hodi sustenta nia família. Tanba nia Aman Natalino Bereati Gonçalves no Inan Iria de Jesus sempre hameno liafuan simples maibe nakonu ho signifikadu katak eskola koidadu an to’o remata hodi hetan servisu husi o nia esforsu rasik atu nune’e bele halo mudansa ba ita nia familia nia moris.
Husi motivasaun inan-aman nian Amica ne’ebé ekipa hasoru iha ninian servisu fatin iha Komoro, preokupadu tebes ho nia servisu hanesan Xefe Redasaun iha Radio Comunidade Comoro, no iha tempu balun Amika halao nia servisu hanesan mos Lokutora.
Feto naturalidade Ermera-Atsabe ne’e hatete nia halo negósiu hodi sustenta nia família nia nesesidade prezente maibé nia futuru mak iha mídia no komunikasaun.
“Aktividade ida ne’e hau halo hodi ajuda familia nia presiza loroloron, kona ba hau nia futuru daudaun ne’e ha’u esforsu hela husi estudu iha universitariu no agora finalista, kontinua servisu mos iha média eletronika Radio Komunikade Komoro hodi prepara ba futuru ida ne’ebé serteza”, tenik Amica
Joven feto ho idade 23 ne’e fiar katak servisu nu’udar xefe redasaun ne’ebé nia hala’o dadaun prepara nia ba futuru ne’ebe brilhante no bele fo ksolok ba familia liuhusi ninia esforsu no susesu.
Reportajen: Ekipa Formandus Training GSR-3, Grup 7
Editor/a: Desy Reis & João da S. Sarmento
Discussion about this post