Ba lee naín sira com certesa imi koñese feto potensiál ida-ne’e: Yunnita Godinho. Yunny, naran estimada hosi Yunnitha, mak na’in ba kafetaria SKYRA, iha área Delta 1, ne’ebé maioria hosi ninian kliente sira mak estudante universitáriu. La’ós hanesan graduada seluk ne’ebé depois graduasaun buka servisu, Yunny kria rasik nia servisu hodi harii ninian Kafetaria SKYRA iha 2021, no ikus-mai fó empregu ba ninian empregada na’in sia (9), ne’ebé hothotu graduada hosi universidade sira iha Dili.
Yunny harii SKYRA liuhosi prosesu ida naruk no duru. Hafoin gradua hosi Dili Institute of Technology (DIT) iha 2018, Yunny iha hanoin atu sustenta nia an no nia família liuhosi atividade negósiu ida. Negósiu ne’ebé nia hili mak fa’an hahán.
Nune’e, iha 2019, Yunny hahú fa’an tahu isi (termu Indonézia ba tahu hahisi ho na’an ka modo-tahan), hudi sona ho keiju, no xokolate.
Emprezaria Foin sa’e ne’e hahú hodi de’it ho kapitál $10. Osan ne’ebé Yunny hetan hosi fa’an produtu sira ne’e, nia rai hamutuk, to’o ikus mai loke kafetaria SKYRA.
Hosi ninian negósiu ne’e, Yunny konsege sosa ona karreta ida hodi fasilita ninian servisu.
Maibé iha 2021 sai tinan ida dezafiante tebes: tinan konfinamentu obrigatoiu tanba tranzmisaun COVID-19 iha Timor-Leste. Ho apoiu hosi inan-aman no kolega sira, inklui hosi parseiru I DO EVENT, Yunny kontinua mantein funsionamentu hosi kafetaria ida-ne’e, to’o ohin-loron.
Tan ezisténsia hosi SKYRA, Yunny hetan apoiu no rekoñesimentu hosi Governu no ajénsia ONU nian iha Timor-Leste. Dezde 2022, SKYRA sai ona benefisiáriu ida hosi business pitch no kompetisaun oioin ne’ebé Ministériu Turizmu, Komérsiu no Indústria (MTCI, sigla Portugés) no no Programa Dezenvolvimentu Nasoens Unidas (PNUD) iha Timor-Leste organiza. No Durante ne’e nain ba SKYRA Coffe organiza mos semináriu ho tema oioin hodi motiva foinsaé sira, no halo diskusaun mós ho feto pontesial sira.
SKYRA rejista ona iha SERVE no selu impostu ba Estadu kada fulan dezde 2021.
Hafoin fó han ba isin-lolon, Yunny hahú hanoin atu fó han ba kakutak.
“Ba futuru ha’u sei iha mehi ida atu loke biblioteka no espasu talk-show ba estudante sira atu partilla sira-nia esperiénsia,” Yunny dehan.
Espera katak Yunny nia mehi hodi loke biblioteka bele realiza no joven feto barak bele inspira husi Yunni ninia esforsu hirak ne’e, no bele hakat ho idaidak ninia mehi ne’ebé nakonu ho esforsu no esperansa.
Reportajen: Ekipa Formadus Training-3 RSG, Gp-3
Editor/a: Desy Reis & João da S. Sarmento
Discussion about this post