DILI,18 April 2023-Alumi Parlamentu Foinsa’e Timor-Leste APFTL liu husi asemblia reuniaun jeral deside hodi halo survey ba joven sira hodi haree no hatene kona-ba partisipasaun politíka iha Timor-Leste.
Prezidente Alumi Parlamentu Foinsa’e Timor-Leste Zaulino Gomes da Silva hateten, atividade surve ne’e inisiativa rasik husi APFTL foku liubá grupu joven ne’ebé ho idade 17-35.
“Survey ida ne’e inisiativa husi APFTL rasik la hetan apoiu husi instituisaun estadu tantu ajensia nasiónal no internasiónal sira ka partidu politíku sira, hodi garante rezultadu ne’ebé ho objetividade la hetan apoiu husi ema ruma”, Katak Zaulino iha salaun APFTL ohin, 18/04/2023.
Zaulino informa objetivu husi atividade ne’e hodi hatene partisipasaun joven sira nian iha partidu politíka ho sira nia interese no preokupasaunba sosiedade liuliu iha estadu diretu demokrátiku, atividade survey ne’e halo ho metodu peskiza semi entrevista estruturadu ho ba joven 350, durante fulan tolu husi fulan Febreiru to’o fulan April ba munsípiu 11 la inklui Ataúro, Manufahi no RAEOA
“Iha survey ne’e hatudu katak, joven sira-nia preferénsia hili partidu CNRT ho pursentu (39,9%), hili partidu FFRETILIN pursentu (28,5%), PD (18,3%), hili partidu KHUNTO (5,7%) no hili seluk partidu seluk ho pursentu (7,6%), no mós rezultadu survey seluk hatudu mós razaun joven sira deside hili partidu polítiku ho persentajen (37,89 %) tamba figura ho pursentu, (37,58%) deside hili partidu polítiku tamba vizaun ho pursentu, (13,68%) tanba istoria no seluk (10,88%)”, informa nia.
Aleinde ne’e nia mós esklarese tan katak, atraves husi joven sira-nia preferensia ba asuntu ne’ebé governu sira presiza prioritiza mak asuntu Edukasaun, Infrastrutura, Saúde, Ekonómia no Kampu Traballu.
Reportanjen : Maria de Rosa
Editor : Jonas
Discussion about this post