Hikis Kosar, Homan Futuru

Dili– Mehi sei sai realidade liu husi hikis kosar, determinasaun no servisu maka’as. Ida ne’e mak hanesan liafuan motivasaun ne’ebé deskreve moris husi mane foinsa’e Angelino Horta, maske idade sei ki’ik, nia halo serbisu todan hodi buka osan ba nia eskola no ba familia.

Ba jornalista Radio Liberdade iha Mota Komoro, Dili, Horta ne’ebé ho tinan 17 no eskola iha Ensino Báziku Filial 3ᵒ Ciclo, Batu-Manu, Ermera, hatete tempu ku’u kafé, nia ajuda nian inan-aman ku’u kafé no wainhira ferias eskola, nia tu’un mai Dili pinera rai-henek hodi fa’an.

“Maske ha’u nia idade ki’ik maibé tanba ekonomia família nian  la sufisiente mak obriga  ha’u tenke  pinera rai henek hodi ajuda inan-aman  no ha’u nia eskola rasik nia konta ba Jornalista Radio Liberdade  iha Mota Komoro Dili, Quarta-Feira, 24/08/2022.

Horta hatete nia moris husi família agrikultór no nia sente orgullu agora dadaun eskola ona to’o klase sia (9^ᵒ ano), liu husi nia esforsu tomak durante ne’e.

“Durante ne’e ha’u hala’o  estudu  iha Munisípiu Ermera iha Eskola Ensino Báziku Filial 3ᵒ Ciclo Ermera, Batu-Manu, no  ha’u iha klase sia (9^ᵒ ano), sente orgullu ho  ha’u nia familia  maske ekonomia la sufisiente,  maibé ha’u  mós bele hakat to pasu ne’e  inklui  mós esforsu an liu husi ku’u kafé no pinera rai henek  hodi responde ba ha’u nia fasilidades eskola nian,’’ Horta dehan.

Nia deklara  moris labele depende ba inan aman no tanis ba situasaun susar, maibé esforsu hodi hadi’a moris halo sai furak liu tanba susesu liu husi prosesu la’os protesta.

“Ha’u pinera rai henek kada loron ida rai henek reit ida, entaun  ha’u  hetan de’it  $20, karik iha kliente balu ne’ebé atu hola barak, entaun ha’u husu ajuda ba maun atu ami rua pinera rai henek to’o reit rua  hanesan ne’e ami hetan $40 loron ida, entaun ami rua  fahe tia osan  ne’e  hodi responde ba ami nia nesesidade,’’ Angelino haktuir.

Ikus liu, nia mós husu ba Governu atu kria kampu servisu barak ba Timor oan sira atu bele kore sira husi kiak.

Hau hakarak sujere ba  governu atu  kria kampu serbisu ba foinsa’e sira tanba   joven barak husik sira nia rai  no estudu  tan de’it ekonomia família nian la sufisiente ba sira atu  kontinua sira nia estudu hodi ba buka moris iha estranjeiru, tan ne’e governu tenke toma atensaun,’’ nia hakotu.