Dili Dialogue Forum, Konsellu Imprensa Ko’alia Obstaklu Media Iha Era Dijital

Dili – Ohin Konsellu Imprensa Timor-Leste hahu hikas Dili Dialogue Forum hafoin pandemia COVID-19 hodi ko’alia konaba osbtaklu sira mak média iha Timor-Leste no Sudeste Asiátiku hasoru iha era dijital.

Entrevista Prezidente da Repúblika Timor-Leste, Jose Ramos Horta

Iha nia diskursu wainhira loke Dili Dialogue Forum, Prezidente da Repúblika Timor-Leste, Jose Ramos Horta, hatete média agora hasoru obstaklu barak inklui presaun husi polítiku hasoru jornalista sira ho kriminalizasaun defamasaun.
“Ha’u la konkorda ho lei kriminaliza defamasaun, ha’u hakarak lei ne’e muda, ha’u sei propoin para muda labele kriminaliza defamasaun. Lalika lakon tempu lori kazu sira ba Tribunal, ko’alia mak ho Press Council, nia papél mak ida ne’e, monitor atividade liberdade imprensa hotu,” Ramos-Horta hatete.

Iha intervista ho jornalista sira hafoin loke Dili Dialogue Forum, Prezidente Konsellu Imprensa Virgilio Guterres hatete forum ne’e hala’o hodi fahe esperiensia entre regulador média sira iha Sudeste Asiátiku.
“Forum ne’e serve hanesan fatin atu fahe esperiensia entre organizasaun média, regulador média sira iha Asia no Pasífiku,” Guterres hatete.

Nia dehan dalabarak politiku sira konsidera média hanesan obstaklu ida ba sira, maibé nia hatutan ho atividade sira hanesan ne’e bele muda sira nia hanoin katak média hanesan parseiru krítiku ba sira no mos sosiedade tomak.
“Tenke hanoin dehan obstaklu sai ba parseiru krítiku ba polítiku sira no sosiedade sira, liuliu atu kontribui ba ita nia objetivu komun sosiedade demokrátiku iha Timor ninian, nomos sosiedade ne’ebé inkorpora ho rai seluk-seluk no plataforma rejional,” Guterres deklara.

Tuir nia, iha era dijital agora ne’e, média tradisional sira persija kompete maka’as no persija halo buat foun hodi kombate informasaun falsu.
“Plataforma dijital fo influensia ba ita nia sosiedade nia forma hanoin no jornalista sira tenke prova katak sira mak smart people, sira mak ema matenek atu uza smart phone. Dezafiu bo’ot liu ne’e ba média konvensional sira mak hanesan jornal, radio e televizaun sira, unkiu solusaun ba sira mak berani tampil beda,” Prezidente Konsellu Imprensa ne’e dehan.

Forum ne’e suporta husi UNESCO no partisipa mós husi reprezentante Konsellu Imprensa sira husi Filipina, Tailandia, Indonesia, no Myanmar inklui estudante universitáriu sira.