Radio, online – Atu aslera servisu ba kandidatura Prezidensial Francisco Guterres Lu-Olo, partido FRETILIN aluga uma hodi halo sede ekipa susesu durante kampaina nia laran.
Seremonia loke sede Nasional ba ekipa susesu Lu-Olo nian ne’e halao iha Alkatiri nia uma iha Surik Mas, Tersa, (12/2).
Iha biban ne’e Kandidatu Prezidenti Lu-Olo fo obrigadu ba kamarada Alkatiri ne’ebe laran luak tebes oferese uma ida ne’e ba ekipa susesu liliu ba aktividades kampaina iha eleisauun mai ne’e.
“Hau fo obrigadu ba hau nia kamarada ne’ebe iha intereses tebes ba hau nia kandidatu ne’e hodi entrega uma ne’e hodi halao servisu ba hau nia kandidatu,”dehan Lu-Olo.
Eis Prezidenti Parlamentu Nasional 2002-2007 ne’e hatutan, hanesan sidadaun iha intereses tebes ba vida nasaun nian no povu ida ne’e. Lu-Olo hatudu ona ninia didikasuan ne’e liu husi durante 24 anos moris iha airalan hanesan ema politiku hamutuk ho armada sira luta ba Indendensia.
Iha fatin hanesan Sekertariu Geral FRETILIN Mari Alkatiri hateten, uma ida ne’e hanesan fatin ba ema hotu atu mai asesu hodi hatene los, kandidatu Lu-Olo nia knar wainhira sai Prezidenti ba nasaun ne’e iha tinan lima oin mai.
“Hau fo uma ne’e atu halao servisu maka’as hodi Kamarada Lu-Olo kompete ho kandidatu sira seluk ba Prezidenti da Republika,”dehan Alkatiri.
Alkatiri hatutan, ekipa susesu kandidatu Lu-Olo nia laos deit mai husi Partido FRETILIN maibe mos ema balun mai husi partido CNRT, PD no partido sira seluk. Tamba ne’e iha kampaina laos lori deit bandeira partido maibe mos bandeira nasional.
Razaun fo uma ne’e ba ekipa susesu kandidatu Lu-Olo, tamba Alkatiri laos foin koinese Lu-Olo.
“Hau kuinese Lu-Olo tamba ne’e hau dehan katak, Maromak rasik mos lakoi hafahe ami nain rua. Inferno iha 2006 -2007 la fahe ami,”Alkatiri komenta.
KORESAUN
Hare ba Titlu Notisias iha leten iha failansu husi redasaun. Tuir komfirmadu, lolos Uma ne’e laos oferese husi Mari Alkatiri ba ekipa susesu kandidatura Francisco Guterres ‘Lu-Olo. Lolos ne’e, ekipa susesu aluga uma ne’e husi nain Jose Ximenes durante kampainha Prezidensial. Liu husi koresaun ne’e redasaun husu deskulpa!!!.
Discussion about this post