Radio, online – Liu husi aniversariu Unidade Komponente Naval F-FDTL ba dala 10 (12/1), Primeiru Ministru Kay Rala Xanana Gusmao sadik hodi husu ba foin sae sira iha F-FDTL atu kaer metin instituisaun hodi defende nasaun ho povu ne’e.
“Hau rona katak imi balun sadere ba grupu balun, see iha ema balun hanesan ne’e hasai kedan depois ita halo prosesa tuir lei indisiplinar,”dehan Xanana hanesan mos Ministru Defeza no Seguransa.
Liu husi oportunidade ne’e PM Xanana husu ba joven sira iha F-FDTL atu hamentin institusaun, hametin rai Timor. Xanana dehan mai iha F-FDTL laos atu hatais deit farda iha Unidade komponente Naval ne’e, maibe responsabilidade hodi kontrola riku soin iha tasi laran no defende ba povu sira mak buka moris iha tasi laran.
PM Xanana mos rekoinese iha buat balun mak governu ne’e seidauk atende didiak servisu forsa ninian, maibe nasaun ne’e foun, lao neneik sei to’o objetivu Timor oan hotu hakarak.
PM Xanana mos dehan ba F-FDTL sira katak, iha nasaun seluk lao ba sidik bebeik. ne’e duni F-FDTL sira tenki asegura atu iha konfiansa nafatin husi povu no mundu internasional.
“Hau la promete ba imi, maibe ba futuru hau sei hare didiak imi nia kondisaun atu halao knar ho diak liutan,”Xanana akresenta.
Discussion about this post