Radio, online – Kantor Berita Radio 68H, liu husi Perhimpunan Pengembangan Media Nusantara (PPMN) serbisu hamutuk ho Timor Leste Media Development Centre (TLMDC) durante loron hat nia laran halao treinamentu ba jornalista radio Timor oan, konaba oinsa hakerek feature ba radio.
Jornalista Timor oan sira ne’e mai husi Radio Liberdade, Radio Timor Leste, Radio komunidade Suai, no Freelance radio -Search for Common Ground (SFCG). Total jornalista nain walu mak tuir treinamentu ne’e. Treinamentu ne’e halao dia 12-15 iha salaun treinamentu TLMDC Kolmera, Dili.
Treinador Asia Calling KBR68H Citra Dyah Prastuti Tersa (13/12) hateten katak, treinamentu ne’e aprende hamutuk no fahe koinsementu ho partisipante sira, oinsa hakerek feature ho kualidade. Treinamentu ne’e enkoraza jornalista radio sira be’e produs notisias ho feature radio ho kualidade.
“Iha treinamentu ne’e partisipante sira sei halo pratika iha kampo atu sira bele hatene saida mak Feature radio no oinsa sira sei halo rasik iha sira nia radio idaidak,”dehan Citra.
Partisipante Treinamento Jornalista Radio Timor Leste Matus Fernandes hateten, treinamentu feature radio ne’e ajuda los ba jornalista radio atu iha futuru bele halo programa feature ho diak iha ididak radio.
Tamba ne’e importante tebes ba Jornalista Timor oan sira iha Radio atu bele aumenta tan programa balun iha radio.
“Hau senti konteti tamba treinamentu ne’e organiza husi TLMDC, liu husi treinamentu ida ne’e hau bele aumenta tan programa hanesan ne’e iha ita nia radio ida idak” dehan Matus.
Partisipante sira nebe hola parte iha treinamentu liu husi selesaun idea tema nebe sira hatama iha TLMDC depois halo selesaun iha Jakarta.
Discussion about this post