Radio, online – Liu husi debate Orsamentu Geral do Estadu (OGE) 2012 Parlamentu Nasional aprova proposta husi governu hodi deve osan ho valor U$ 33,1 miliaun. Tuir planu governu sei deve osan ne’e husi nasaun China, osan hirak ne’e sei uza hodi halo kontruksaun halo estrada Maubisse-Same.
Aprovasaun ba deve ne’e liu husi debate espesialidade OGE 2012, iha Uma fukun PN Segunda, (14/11).
Antes atu halo diskusaun Opozisaun bankada FRETILIN hato’o proposta eliminasaun hodi trava deve osan ho montante bo’ot ne’e. Maibe FRETILIN labele trava ambisaun governu AMP nian ne’e tanbliu husi aprovasaun foti kartaun Deputadu Maioria parlamentas apoia governu deve osan ne’e.
Deputadu opozisaun FRETILIN Osorio Florindo hateten, diak liu governu labele deve osan bo’ot ne’e husi nasaun seluk, tanba TL mos iha rasik osan ne’ebe mak tau hela iha banku federal Amerika ne’ebe mos bo’ot no funan dadaun ne’e.
“Ita deve ne’e hanesan tusan ida ne’ebe mak ita rai hela ba ita nia jerasaun mai ne’e. Ita deve ne’e bele mais ita iha osan ba deve tan halo saida. Pior liutan mak ita nia jestaun ladiak. Ho osan bo’ot ne’e hamosu mos korupsaun,”Osorio kestiona.
Hatan ba prekupasaun ne’e Primeiru Ministru Kay Rala Xanana Gusmao dehan, deve mak governu atu foti ne’e laos taka matan maibe iha planu urgente hodi hadia estrada ne’ebe mak povu agora dadaun ejiji hela ne’e.
Tuir Xanana deve ne’e osan ne’e laos atu maneija husi TL ba kontruksaun estrada. Ho osan bo’ot ne’e sei halo tendernizasaun Internasional hodi hadiak estraga mak at entre Maubisse ligasaun ho Same.
“Ita mak deve maibe osan ne’e laos mai ita hodi jere orsamentu ne’e. maibe osan nain hamutuk ho kompanha Internasional mak jere osan ne’e ba nesesidade ita nian tuir kualidade standar Internasional,”Xanana esplika.
Discussion about this post