Radio, online – Filme ho titulu “Halai dok – Augusto Ramos iha eventu halai maratona iha Nova Yorke 2010” konsege manan premiu Audience Award iha kategòria “Sport and Society – Sport Values” = (Desportu no Sosiedade – Valor husi desportu nian), iha eventu bo’ot “FICTS Sport Movies and TV Fest” ne’ebe hala’o iha sidade Milan – Italia.
Informasaun ne’e radioliberdadedili.com rekoila husi Gabinete informasaun Prezidenti da Republika liu husi via email Kinta, (10/11).
Komunikadu ne’e hatutan, filme ho durasaun tempu minutu 18 ne’e, nudar parte ida husi kampaña “Dili Sidade Dame” ne’ebe inisia husi Prezidente José Ramos-Horta no hetan suporta finansiamentu husi ajensia Alemaña nian, GTZ.
Eventu ne’ebe halo iha sidade Milan ne’e, atende mos husi partisipantes husi nasaun barak, hodi nune’e, eventu ne’e sai nudar oportunidade ida ne’ebe di’ak hodi hatudu situasaun dame no partisipasaun aktivu Timor-Leste nian iha eventu desportu iha nivel internasional. Prestasaun ne’ebe hetan iha festival ne’e, bele sai mos nudar motivasaun ida ba oin, ba aktividades hodi halo filmajen iha rai laran.
Filme ne’e rasik sei hatudu liu husi kanàl televizaun nasional, TVTL, nomos iha eventus no workshop balun iha nasaun laran.
Produtòr filme ne’e sente orgollo ho susesu ne’e, nomos kontente tamba filme ne’e rasik konsege atrai ona ema barak hodi harè, tantu audensia nasional ou estranjeiru, ne’ebe ikus mai halo filme ne’e konsege manan premiu iha festival ne’ebe halo ona ba dala 29 ne’e.
Ekipa husi filme ne’e rasik kompostu husi; camera woman Anne Pressler, ne’ebe mos akompaña atletas Timor-oan sira, Augusto Ramos no Agida Amaral iha eventu maratona internasional Nova Yorke 2010. Xefi editòr mak David Bochu ne’ebe hala’o knar ho kolaborasaun husi Timor-oan sira balun.
Discussion about this post