Radio, online – Dia 27 Outubru 2011. Atleta maratona Timor-oan na’in rua, Calisto da Costa (tinan 28) husi distritu Lautem, no Lola Gonsalves Gama (tinan 19) husi distritu Liquisa sei partisipa iha eventu maratona internasional Nova Yorke, ne’ebe sei hala’o iha sidade Nova Yorke Estados Unidos, iha loron 6 fulan Novembru tinan ne’e.
Informasaun ne’e radioliberdadeonline.com liu husi komunikadu emprensa, Gabinete da informasaun Prezidenti da Republika foin Sesta, (8/10).
Hodi nune’e, iha loron Tersa-feira (25/10) atleta nain rua ne’e, hakat-an ba Palasio Prezidente Nicolao Lobato hodi komprimenta Prezidente Republika, Josè Ramos Horta molok husik hela Timor-Leste. Ohin, 27 Outubru 2011 ba nasaun Singapura hodi hala’o treinamentu durante semana ida iha nasaun refere no semo hikas ba sidade Nova Yorke hodi partisipa iha eventu internasional ne’e.
Iha sorumutu ne’e, Xefi Estadu Jose Ramos Horta husu ba Calisto no Lola atu bele fo sira nia esforsu tomak hodi hamorin liu-tan Timor-Leste nia naran iha Nova Yorke. Hatan-ba lian-menon Prezidente nian ne’e, Calisto no Lola hateten katak sira na’in rua sei esforsu-an maka’s hodi hetan rezultadu ne’ebe màksimu.
Iha komunikadu ne’e hateten, Xefi delegasaun Richard Bell hateten katak prezensa atleta Timor-oan sira iha Nova Yorke ne’e ho objektivu prinsipal hodi habelar no hamorin liu-tan Timor-Leste nia naran iha mundu.
Richard mos salienta liu-tan katak Calisto no Lola iha ona kapasidadae no mental ne’ebe preparadu hodi bele kompete ho atletas internasional sira seluk husi nasaun oi-oin ne’ebe sei partisipa iha eventu refere.
Entertantu atletas na’in rua ne’e hakat-an ba Nova Yorke tamba hetan apoiu husi Presidensia da Republika. Apoiu refere hanesan parte ida husi inisiativa Prezidente Ramos Horta nian iha programa “Dili Sidade Dame”.
Alende fo apoiu ba atletas na’in rua ne’e, iha programa “Dili Sidade Dame” nia okos, tinan ida ne’e Prezidensia Republika mos organiza eventu internasional balun hanesan kurida biskeleta “Tour de Timor”, eventu maratona internasional “Dili Internasional Marathon”, no “Fishing Competition”.
Discussion about this post