Radio, online – Relasiona ho rumoris no sai isu bo’ot iha nasaun ne’e hodi levanta iha PN husi Deputadu sira dehan iha eis sekertaria Ministeiru Agrikultura no Peskas (MAP) hetan detein iha Darwin, Australia husi alfandega tanba lori osan US$ 400,000,00. Hatan ba kazu ne’e Ministru MAP Mariano Assanami Sabino dehan lia fuan sira mak Deputadu sira foti iha Parlamentu Nasional ne’e mesak bosok, falsu no rumoris deit.
“Hau laiha funsionairu foin lalais ne’e ba Australia no saida mak deputadu sira koalia ne’e mesak bosok deit. hau husu ba povu sira lalika fiar deputadu sira mak koalia bosok, tanba bosok ne’e hatun sira nia dignidade,”dehan Assanami liu husi konferensia da empresa Kinta, (13/10) iha nia servisu fatin.
Assanami hatutan, osan ne’ebe temi ne’e bo’ot los. Sei laiha ema ida barak barani lori osan bo’ot hanesan ne’e atu ba estranjeiru.
Iha oportunidade ne’e Assanami rekoinese Deputadu sira bele hakilar ba saida deit mak halo sala husi governante, maibe Assanami husu hakilar tenki ho lia los no presiza identifika kazu ne’e los. Deputadu labele soe lia bosok hodi bosok mos povu sira. Tamba deputadu nia dignidade ne’e mak labele koalia lia bosok, see koalia lia bosok deputadu nia dignidade hotu ona.
Assanami husu mos ba jornalista wainhira rona informasaun ne’ebe seidauk los tenki buka noa halo cross check in richeck.
“hau laiha relasaun ho kazu lori osan bo;ot ne’e no hau sei la prekupa ba kazu ne’e. hau agora atu hare ba orsamentu estadu 2012 hodi hare diak ba moris agrikultura ninian,”nia komenta.
Iha loron ne’e kedan Konselu Ministru deskuti ba kazu ne’e hodi klarifka dehan kazu ne’e laiha no lia rumoris deit. liu husi konselu ministru ne’e, husu ba jornalista sira atu halao knar ho profesionalizmu.
Discussion about this post