Radio, online – Timor Leste – Korea dos Sul hakerek tan istoria iha area ko’operasaun bilateral. Segunda (26/9) sai istoria ba loron ne’e, Korea dos Sul entrega ro’o navios 3 ba iha area komponente Naval F-FDTL nian hodi kontrola diak liutan aktiviadades iha tasi Timor.
Serimonia entrega ro’o navios 3 ne’e halao iha Portu Dili. Ro’o navios patrolia 3 ne’e hetan bensaun husi Padre kapelaun F-FDTL, Pe. Angelo Salsinha. Naran ba ro’o navios 3 ne’e mak Dili, Hera no Kamanasa.
Reprezentante Republika Korea do Sul Maijor General Jeon Dond Wun iha ninia diskursu hateten, delegasaun Korea do Sul fo esforsu tomak intrega Ro’o patrolia 3 mai Timor Leste, tamba TL hanesan nasaun ida ne’ebe suporta husi nasaun internasional no unidade heroi sira ne’ebe agora iha ohin hari estado soberanu iha mundu tomak
Jeon Dond Wun afirma liutan, iha indepedensia nia laran TL hatudu solidariedade nasional banhira delegasaun Naval F-FDTL tuir treinamentu iha Korea do Sul hatudu ona sira nia inteligensia. Iha tempu badak nia laran nasaun TL mos bele sai hanesan nasaun ne’ebe dezenvolvidu no model ida ne’ebe rekonsiliasaun nasional.
Entrega Ro’o patrolia 3 mai iha TL hanesan misaun foun ida hodi protese costa sul no rekursu tasi laran nian liliu bele kontribui seguransa nasional. Espera katak, liu husi ro’o patrolia 3 ne’e bele hametin diak liu tan realsaun iha futuru, liliu iha area sosial ,kultura no seluk tan
Iha fatin hanesan Vice Primeiru Ministru Jose Luis Guterres hateten, Nasaun Korea do Sul ho nasaun Timor Leste iha mos istroria pasadu seminarios. Iha pasadu nasaun rua ne’e povo terus hotu bainhira luta ba indepedensia.
“Ita hotu hare republika Korea do Sul hakarak fo ba ita meus ne’ebe atu ita protese ita nia osan para luta mos kontra peska ilegal. Hodi garante katak sirkulasaun komersio internasional ne’ebe liu husi ita nia forsa maritima bele halao ho situasaun paz,”Vice PM komenta.
Vice PM, governu AMP hatutan, tinan tinan nasaun TL ho povo lakon rekursu barak tebes. Kuaze sinkoenta milloes tamba deit peska ilegal. “Ita rona mos iha ita nia tasi ema barak mai halo trafiku ilegal depois komunidade internasional tomak kondena ita. Ho ajuda ro’o 3 ne’e bele sufsiente ba ita atu kontrola ilegal no trafiku internasional iha ita nia tasi laran,”realsa Jose Luis.
Ba iha futuru, Vice PM hateten, iha tempu ida TL mos sei sai ASEAN hodi tama fo garante seguransa iha zona pasifiku.
Iha eleisaun jeral 2012 mai, koalker governu ne’ebe ukun hari’i nafatin forsa armadas Falintil F-FDTL atu fo meus hodi nune’e bele defende soberania indepedensia.Tamba ne’e husu ba Falintil F-FDTL atu mantein nafatin kna’ar hanesan forsa defeza nasaun TL.
Iha fatin hanesan Prezidente da Republika Jose Ramos Horta husu ba governu ho orsamentu tinan 2011 atu tau kedas osan ba iha oficina profisori atu nune’e bele simu ro’o ahi sira ne’e. Presiza tebes halo manitensaun iha ne’e.
“Ita iha ona ro’o hamutuk 7 sai orsamnetu todan tebes tinan tinan governu hasai orsamentu bo’ot ba iha rai liur hodi halo manutensaun, see ita nia rai rasik sidauk iha oficina profisori. Diak liu ita presiza tebes halo hari oficina iha ne’e,”PR Horta sujere.
Komandante Komponente Naval, Koronel Pedro Klamar Fuik ba jornalista dehan, ro’o patrolia navios 3 ne’e seidauk uza depois prosesu intrega. Presiza fulan 3 halo prosesu de familiarizasaun, depois treinamentu operasaun naval remata.
“Ho ajuda ne’e fasilita ona area maritima nian hodi kontrola diak liutan ba ita nia riku soin iha tasi laran, maibe bafuturu importante liutan mak governu presiza investe maka’as ba area ne’e,”nia sujere.
Iha ceremonia entrega ro’o navios patrolia 3 ne’e hetan partisipa husi, Presidente Republika Jose Ramos Horta , Presidente Tribunal Rekursu Claudio Ximnenes, Prokurador Geral da Republika Ana Pesoa, Maijor General Taur Matan Ruak, Secretariu Estado Defesa Julio Tomas Pinto, Sargentu F-FDTL, no Forsa Armadas husi internasiois.
Discussion about this post