Radio, online – Relasiona ho komemorasaun loron mundial ba foin sa’e sira nia, Conselho Nasional Juventude Timor Leste (CNJTL) parseiru ho Search for Common Ground (SFCG) realize forum sorumutu foin Sa’e ba dala rua hamutuk ho juventude 50 mai hosi Distrito 13.
Forum sorumutu ba foin sa’e ne’e halao iha edisifiu CNJTL Farol, Dili, (10/8). Forum sorumutu ne’e halao durante loron tolu (Kuarta- Sesta, 10-12 Agusto-2011).
Prezidenti Conselho Nasional Joventude Timor Leste (CNJTL) Leovigildo Ornai ba jornalista Radioliberdadedili online hateten, objetivu realiza forum sorumutu ba foin Sa’e ne’e atu halo avaliasaun no balansu ba hanoin ne’ebe iha forum nia laran no mos atu dezenvolve susesu sira hosi asuntu sira ne’ebe foin sa’e sira identifika iha tinan liu ba.
Prezidenti CNJTL mos dehan, komemorasaun loron mundial ba foin sa’e, ba tinan ida ne’e parte CNJTL servisu hamutuk ho SFCG atu halao atividade hanesan donor ran, limpesa jeral no diskusaun. Programa sorumutu ne’e tama iha diskusaun nian.
“Ita prezia nafatin halibur foin sa’e sira atu fo sira nia ideia konaba progresu no dezafiu ne’ebe mak sentru juventude distritu ididak hasoru. Dalan ida ne’e atu foin sa’e sira iha hanoin ba vizaun moris no dezenvolvi nasaun ne’e liu husi aspeitu oioin,” Leovigildo akresenta.
Iha fatin hanesan Diretor Search for Common Ground (SFCG) Jose Francisco de Sousa hateten katak, aktividade ne’e hanesan kontinuasaun hosi forum nasional juventude nian, ne’ebe halao ona iha tinan 2010. Forum sorumjutu ne’e halao, hodi refleta komprimisiu hosi CNJTL ho SFCG nian liliu hodi promove partisipasaun joventude nian ba hametin paz iha nasaun ne’e.
Francisco hatutan, iha oportunidade forum sorumutu ne’e mos atu hare hikas problema hirak ne’ebe mak identifika ona iha tinan liu ba hodi diskuti hamutuk progresu hosi problema hirak ne’ebe mak hetan mudansa ou progresu ruma.
“Ami nia programa ne’e, tanta buka oinsa ita nia foin sa’e tama ba prosesu dezenvolvimentu iha nasaun ne’e. ami mos provoka foin sa’e sira atu hadok an husi violensia ne’ebe ninia impkatu ba estabilidade nasaun ne’e nian. hodi hatete ba foin sa’e sira Hakribi violensia,”Francisco komenta.
Entertantu Laurentino sa Silva hanesan estudante Universidade Nasional Timor Lorosa’e iha nia ninia hanoin katak, aktividade hanesan ne’e importante tebes tamba atu hasae kunhesementu joventude sira
“Aktividade ne’e hanesan material estra ida atu aprende diak liu tan tamba estudante laos atu aprende deit hosi mestra no mestri maibe bele aprende mos hosi parte seluk,” dehan Laurentino.
Discussion about this post