Radio, online – Liu husi sorumutu dahuluk jumpa Fans Club Radio Liberdade (Raliber) hodi hili Xefi Aldeia Aitarak Laran Norberto Minano sai hanesan Prezidenti Fans Club Raliber.
Enkontru jumpa Fans Club Raliber ne’e halao iha salaun enkontru TLMDC, Kolmera, Sabadu (6/8). Xefi aldeia ne’e ho nia naran anin iha Raliber “Bito Osama”. Alende hili Prezidenti Fans sira mos hili kordenador club iha bairo ida-idak.
Fans club ne’e mos rekomenda atu fans sira mos hola parte iha aktividades Raliber nian.
Prezidenti Fans Club Raliber hateten, media importante ba ema nia moris, liliu moris iha era globalizasaun.
Nia konfesa katak, ho radio barak ona mak sai ninia fans iha ema barak mak sai ninia kolega. Kolega ne’e husi parte ne’ebe deit. Husi fans ne’e kria amizade no kria aktividades desportu.
Razaun mak atu minimiza konflitu tuir Bito katak, hahu dezde 2006 mosu krizi iha bairo-bairo jovens sira sempre hare malu matan la mos, sempre tuda malu. Maske iha sosializasaun barak ona mak halo maibe sei nafatin konflitu entre joven. Razaun Bito dehan ho Raliber minimiza konflitu tanba iha fans radio ne’e jovens barak mak iha. Husi parte oioin no arte marsiais oioin.
Iha sermonia jumpa fans ne’e, fans sira koinese malu ho ida ne’e mak jovens sira iha hanoin ida deit katak diak liu lalika mete ba problema. Hanesan Xefi Aldeia nia husu jovens sira maske laos fans Raliber importante hari unidade, kria amizade no paz. Tanba nasaun ne’e presiza lao ba oin.
Iha fatin hanesan Diretora Raliber Shandy Sequeira iha jumpa Fans Club Raliber, husu ba foin sai sira atu ativu hodi fo ideias ba programa Fans Club no programa Raliber.
“Fans sira mak parte importante ida husi Raliber hodi lao ba oin. Husi fans club ne’e bele hari paz no amizade entre komunidade. ,”Shandy esklarese.
Iha sesaun abertura jumpa Fans Club Diretor TLMDC Francisco da Silva Gari hateten, TLMDC hanesan mahon ba Raliber sei kontinua fo apoiu programa radio nian.
Radio ne’e hari no nakloke ba partisipasaun membru komunidade sira, ne’ebe mak hakarak atu kontribui ba prosesu hari demokrasia, liu husi programa Raliber.
Objetivu husi hari Raliber ne’e atu kontribui iha dezenvolvimentu liu husi desiminasaun, informasaun no fo fatin ba pratika jornalizmu nian. TLMDC hanesan instituisaun ne’ebe durante ne’e fornese treinamentu jornalizmu iha area radio, online, jornais no audivisual ba foin sae sira.
Raliber hari iha 28 de Outobru 2010, hetan lansamentu husi Sekertariu Estadu Konselhu Ministru Interino Avelino Coelho. Raliber mos rejistu ona iha ARCOM (Autoridade Reguladora das Comunicações Timor-Leste).
Discussion about this post