Radio, online – Liu husi Xefi Aldeia 01 Hudi Laran, Suku Aisirimou Sub-distrito Aileu Villa, Distritu Aileu Antonio Bonaparte senti tristi ba governu lokal no nasional tanba la atende ba proposta konaba atendementu dezastre no infrastrutura.
“Ami nia proposta ate agora la iha ida mak aprova. Hau senti triste ho governu proposta ne’ebe ami hatama ne’e laos ami nia hakarak maibe ida ne’e prekupasaun husi komunidade,”dehan Antonio Bonaparte ba radioliberdadeonline (22/7) foin lalais ne’e iha nia hela fatin.
Antonio hatutan, iha aldeia 01, maioria povu moris iha agrikultura no hakiak animal. Iha aldeia ne’e, iha tempu bailoron povu barak mak halo modo. Prekupasaun mak konaba estrada, tanba transporte atu asesu ba aldeia ne’e susar tebes.
Hatan ba tristeza ne’e Deputadu Pedro da Costa iha Parlamentu Nasional husi komisaun G esklarese, proposta ne’ebe xefi suku ou Xefi aldeia sira hatama ne’e laos buat ida simples atu atendimentu ba iha suku ida.
“Situasaun jeral iha ita nia rai laran depois ita hare ba posibilidadei ida nebe mak atende uluk. Hau hanoin iha suku barak mak hanesan tamba guverno atu aprova ne’e tenke hare ba kestaun global no maibe guverno laos lakoi aprova,” Pedro hatutan.
Deputado ne’e husu ba Xefi suku no Xefi aldeia sira kuandu halo proposta atu hatama ne’e tenke liu husi kriteria nebe’e fo sai husi ministerio kompetente. Proposta tenke hetan verifikasaun husi supervijor regional no halo evaluasaun rekerimentu ne’ebe tenke kumpri.
Discussion about this post