Radio Online – Iha loron Kinta jornalista (9/6) Acasio Pinto ho Wilhelmina husi radio Liberdade online hakat ba Tibar fatin ikus husi foer sira ne’ebe rekoila iha Dili laran. Iha fatin ne’eba jornalista nain rua ne’e dadalia ho Maria feto ho idade 12, esforsu tebes hodi hatutan familia nia moris ho halibur foer. Feto ho naran kompletu Maria Da Concencao ne’e sei tur iha banku eskola Pre-Sekundaria Klibur, madre sira nian, klase II.
Maske Timor Leste ratifika konvensaun direitus labarik nian no TL mos iha lei rasik hodi defende direitus labarik nian, maibe realidade moris povu Timor nia oan ne’ebe sei minoria tenki servisu maka’as hodi sustenta ekonomia familia ninian.
Mery ne’ebe naran bolu maina husi familia ne’e dader tenki ajuda inan-aman fase bikan, dasa rai no tuku 8:00 otl ba eskola. Fila husi eskola tuku 12:30 otl ba fatin lisu nian hodi halibur foer sira. foer sira ne’e mak hanesan hahan restu, kaleng serveza, dos at, besi, aluminium, agua mamuk, no foer sira seluk mak sai husi kapital Dili.
Sasan at sira ne’e wainmhira halibur barak iha kompanha sira mak sosa besi at ba tetu. Rezultadu halibur lisu sira ne’e kada loron ida bele hetan US $30,00.
“Ami mai hili lisu ne’e atu ajuda ami nia inan aman sira atu bele sustenta aminia escola tamba liu husi aktividade ida ne’e mak ami bele suporta ba aminia moris lolon loron,”dehan Mery ho oin nakraik.
Hahan restu ne’ebe mak Mery halibur hodi fo han fahi ne’ebe sira hakiak. Mery hanesan oan feto klaran husi oan nain hat. Mery hahu hili foer husi 2008. Nia konfesa hahu rekoila lisu ne’e ,premeiru nia sai moras tanba kondisaun hili lisu fatin la diak.
Maibe ikus mai toman ona babain deit. Laos deit Mery, labarik seluk barak mak rekoila foer hodi ajuda ekonomia uma laran.
Mery hatutan, wainhira hau fila husi eskola, hau husu hau nia inan, hau ba hili lisu lai. Hau nia ina aman hatan dehan ba deit.
Entertantu tuir observasaun jornalista Radio online iha fatin lisu ne’e laos deit Mery mesak maibe ema barak tebes hahu husi ferik katuas sira to’o labarik, nune’e mos animal sira hanesan asu, manu, fahi no karau tama hotu ba fatin ne’e hodi buka hahan restu. Iha fatin ne’e halo ema baibain hakribi tanba lalar ho dois husi foer mak domina.
Discussion about this post