Radio, online – Direitór ezekutivu Timor-Leste Media Development Centre (TLMDC), Francisco da Silva Gari hateten, TLMDC sei halao workshop loron haat kona-ba reportajen mídia nian ba mudansa ambiental ba jornalista Timor oan sira.
Objetivu prinsipal husi workshop ne’e mak atu ajuda hodi hasae kuinesementu jornalista nian iha asuntu ambeintal nian. workshop ne’e hetan apoiu orsamentu husi UNESCO.
Gari mós affirma katak, objetivu seluk husi workshop ne’ebé sei halao iha Kuarta to’o Sabadu (17-20- Outobru-2012) semana oin, hodi kria rede jornalista no parseiru ambiental hanesan ONG sira, nune’e sira bele promove liu tan protesaun ba meu ambiente iha Timor-Leste.
“Workshop ne’e importante ba jornalista sira hodi bele hasai sira ninia kuinesmentu, liliu oinsa sira bele hakerek asuntu ambiental nian iha railaran,” nia hateten.
Nia esplika, dala barak komunidade sira ladun tau importansia ba asuntu ambiental nian, tamba ne’e nia sujere depois workshop ne’e jornalista Timor oan sira bele ona hakerek istória kona-ba asuntu ambiental nian tamba dadauk ne’e Timor-Leste mós hasoru hela problema ambiental.
“Ita nia komunidade sira ladun tau atensaun ba asuntu ambiental nian, tamba ne’e jornalista, liliu mídia sira tenke fó konsensializasaun ba sidadun tomak, nune’e sira bele hadomi liu tan sira nia ambiente moris nian,” nia dehan.
Tuir nia, loloos ne’e mídia hothotu tenke halo politika editorial ida atu bele fó pajina espesial ida ne’ebé públika asuntu ambiental nian.
Workshop ne’e sei halao iha Aula Asosiasaun HAK nian no sei fasilita husi fasilitadór Harry Surjadi husi Indonesia. Harry Surjadi nu’udar jornalista senior ida ne’ebé ho esperiensia barak iha reportajen espesial ba asuntu ambiental nian.
TLMDC hari’i iha 2005, nu’udar NGO nasionál ida ne’ebé serbisu atu hametin kapasitasaun sustentatvel jornalsita Timor-Leste nian hodi bele garantia prosesu demokratizasaun iha railaran.
Discussion about this post